१० मंसिर, गौशाला । विधिशास्त्रको सिद्धान्तले भन्छ- कुनै व्यक्तिले फौजदारी अपराध गर्यो भने त्यसको भागिदार पारिवारका अन्य नातेदारले हुनुपर्दैन, जसले अपराध गरेको हो, ऊ मात्र दोषी ठहरिन्छ । तर, व्यवहारमा यो विधिशास्त्रले काम गर्दैन ।
परिवारको कुनै सदस्यले जघन्य अपराध गर्यो भने परिवारका अरु सदस्यहरुले समेत समाजमा लज्जित हुनुपर्ने र नाकै देखाउन नसकिने स्थिति आउँदोरहेछ ।
बर्दिबासमा भएको बालिका हत्या प्रकरणमा पक्राउ परेका एक अभियुक्तका परिवारजनलाई अहिले यस्तै सकस परेको छ । उनीहरुको भागाभाग भएको छ । र, घरमा आगो लागेको छ ।
****
महोत्तरीको गौशाला बजारको जिरोमाइल चोकदेखि ५० मिटर उत्तरतर्फ एउटा घर छ । सधैं चहल-पहल भइरहने यो घर दुई दिनयता सुनसान छ । सटरमा बाहिरबाट र मूल गेटमा भित्रबाट ताला लागेको छ ।
हामीले आधा घण्टा ढोका ढक्ढक्याएपछि एक व्यक्ति आए र विस्तारै ढोका खोेले । उनी निकै त्रासमा देखिएका थिए । उनले मलिनो स्वरमा सोधे, ‘तपाईहरु को ?
हामीले आफूहरु सञ्चारकर्मी भएको बताएपछि उनले घरभित्र हुले र हतारिँदै ढोका लगाए ।
यो घर राजकिशोर साहको हो, जसका छोरा अरुण साहमाथि ६ वर्षकी बालिका गुलाब खातुनको हत्या गरेको अभियोग लगेको छ । अरुणले प्रहरीसमक्ष साविती वयान दिएका छन् ।
बालिकाको हत्यापछि बर्दिवास अशान्त छ । आक्रोसित भीडले बर्दिबासमा रहेको साह परिवारको घरमा आगो लगाएको छ । प्रदर्शनका क्रममा प्रहरीले चलाएको गोली लागेर घाइते भएका एक युवकको मृत्यु भएपछि तनाव थप चुलिएको छ ।
बर्दिबासको अशान्तिले गौशाला नगरपालिका वडा नम्बर ५ मा रहेको साह परिवारको घर पनि रित्तिएको छ ।
अरुबेला यो घरमा राजकिशोरका दुई छोराबुहारी र तीन नातानातिनी बस्दै आएका थिए । अहिले माइलो छोरा अशोक मात्र घरमा छन् र डरले भित्रबाट ताला लगाएर बसेका छन् ।
‘बर्दिवासको घर जलिहाल्यो, हामीलाई पनि कसैले केही गर्छन् कि भन्ने त्रासमा बाँच्नु परेको छ’ अभियुक्तका दाजु अशोकले भने, ‘त्रासकै कारण दाजू भाउजू अन्यत्र गएर बस्नुभएको छ । मैले पनि श्रीमती र छोराछोरीलाई अर्कै ठाउँमा पठाएको छु ।’
अशोकका अनुसार आमाबुबा पनि सुरक्षाको खोजीमा घर छोडेर अन्यत्रै गएर बसेका छन् । ‘घरको सुरक्षा गर्न म एक्लै बसिरहेको छु । कसले कतिखेर केही गरिदिने हो कि भन्ने डर छ’ बर्दिवासको घर जलेको सम्झिँदै उनले भने, ‘हत्या अरुणले गरेका हुन्, तर उनका कारण हामी लज्जित र असुरक्षित हुनुपरेको छ ।’
मलेसियाबाट फर्किएर अपराध
राजकिशोरका दुई श्रीमतीमध्ये जेठीतर्फका छोरा हुन् सन्तोष भने कान्छीतर्फका अशोक र अरुण । अरुण ४ बर्षकै छँदा उनकी आमाको मृत्यु भयो । त्यसले लालनपोषण जेठीआमा र बुबाले गरे । कान्छो छोरो, त्यसमाथि आमा गुमाएकाले सबैले माया गरे ।
२०७१ सालमा एसएलसी उत्तीर्ण गरेका अरुणलाई बुबाले उच्च शिक्षा पढ्न जनकपुरधाम पठाए । जनकपुरधाममा डेढ बर्ष कोठा लिएर त बसे । तर, पढाइ अगाडि बढाएनन् । ‘यसपछि बुबाले उनलाई वैदेशिक रोजगारीमा पठाउने निर्णय गर्नुभयो’ अशोक भन्छन्, ‘डेढ लाख खर्च गरेर उनलाई मलेसिया पठाइयो ।’
उनले मलेसियामा ५ बर्ष बिताए । तर, आफ्नो कमाइ भनेर घरमा पैसा पठाएको थाहा छैन । अरुण मलेसियामै भएका बेला कोरोना भाइरस (कोभिड-१९) को संक्रमणले विश्व आक्रान्त बन्यो । विभिन्न देशमा रहेका नेपालीहरु घर फर्किए । अरुण पनि वैशाख पहिलो साता नेपाल आए र महोत्तरी पुगे ।
उनलाई मदिराको नराम्रो लत लागिसकेको रहेछ । दैनिक रक्सी पिएर हिँड्न थाले । मदिरा पिएर हिँड्ने क्रममा २८ बैशाखमा आफ्नो बाल्यकालको साथी दिलिप ठाकुरको हत्या गरे । घटनापछि भागेका उनी चार दिनमै पक्राउ परे ।
प्रहरीले उनीमाथि कर्तव्य ज्यान मुद्दा चलाएको थियो । तर, जिल्ला अदालतबाट १ लाख धरौटीमा रिहा भए । अरुणका दाजु अशोक भन्छन्, ‘रिहा भएपछि उनी सुधि्रन्छन् कि भन्ने थियो, अपराध गरेर पनि छुट्दा उनको मनोबल बढेको अहिले महसुस हुँदैछ ।’
‘त्यही मनोबलका कारण उसले अवोध बच्चाको हत्या गर्यो । त्यसबेला नै (रिहा नगरी) जेलमै छोडिदिएको हुने रहेछ’ अरुणका दाजु अशोकले पश्चाताप भावमा भने ।
दाजु अशोकका अनुसार धरौटीमा छुटेपछि बुबा राजकिशोरले अरुणलाई आफूले डेढ वर्षदेखि किराना पसल सञ्चालन गर्दै आएको बर्दिबासमा बोलाएर राखेका थिए । पसलमा आफूलाई सहयोग पनि हुने र निगरानी पनि पुग्ने बुबाको विश्वास थियो ।
‘बर्दिवास पुगेपछि केही समय राम्रै व्यवहार देखाएको थियो । हामीलाई पनि अब सुुधि्रन्छ कि भन्ने लागेको थियो’ अशोक भन्छन्, तर उसले पुनः आफ्नो कुकर्म दोहोर्यायो ।’
मंसिर ७ गते साँझ राजकिशोर पत्नीसहित जनकपुर गएका बेला छोरा अरुणले पसलमा चकलेट किन्न आएकी शहीद आलमकी ६ बर्षीया छोरी गुलाब खातुनको हत्या गरे । र, शव बोरामा हालेर खेतमा फाले ।
बालिका हराएको सूचना पाएपछि खोजी गर्न गएको प्रहरी अरुण बसेको पसलसम्म पनि पुगेको थियो । तर, आफूले नदेखेको प्रतिकृया दिएको आफूले सुनेको अशोक सुनाउँछन् ।
घटना भएको भोलिपल्ट अर्थात सोमबार अरुणले आफ्ना बुवालाई बालिकाको हत्या गरेको सुनाए । लगत्तै बुबा राजकिशोरले नै अरुणलाई गौशालास्थित ईलाका प्रहरी कार्यालय ल्याएर प्रहरीको जिम्मा लगाएको दाजु अशोकले बताए । र, अरुणकै वयानका आधारमा प्रहरीले बालिकाको शव फेला पारेको थियो ।
दाजु अशोकका अनुसार उनको परिवारको प्रयास अरुणलाई सुधार गर्ने नै थियो । त्यसअनुसार प्रयास पनि भएको हो । हत्या अभियोगमा पक्राउ परेका उनलाई परिवारले नै धरौटीमा छुटाएर सुध्रने मौका पनि दिएको हो । तर, उनी सुध्रिएनन् ।
फूलजस्ती गुलाबको हत्या गरेकाले अरुणलाई जति कठोर दिँदा पनि फरक नपर्ने अशोक बताउँछन् । दिनभर म्याजिक चलाएर परिवार पाल्दै आएको आफू भाइकै कारण समाजमा मुख देखाउन नसक्ने अवस्थामा पुगेको सुनाउँदै अशोक भन्छन्, ‘उसले फेरि हत्या गरेको छ, अब गोली ठोकिदिए पनि फरक पर्दैन ।’