२२ मंसिर, काठमाडौं । शनिबार काडिजसँग पराजित भएपछि जायन्ट क्लब बार्सिलोनाले स्पानिस ला लिगामा अर्को झड्का सामना गर्नुपर्यो । रोनाल्डो कोएमनको टिमले २०२०-२१ को सिजनमा निकै खराब सुरुवात गरेको छ । शुरुवाती १० खेलमा बार्सिलोनाले जम्मा १४ अंक मात्र जोडेको छ ।
२६ अंकसहित एट्लेटिको मड्रिड ला लिगाको अंक तालिकामा शीर्ष स्थानमा छ । ११औं स्थानमा रहेको बार्सिलोना भने रेलिगेसन जोनबाट ३ अंक मात्र सुरक्षित छ ।
क्याटलान क्लबले ४ जित, २ बराबरी र ४ हार बाट १४ अंक जोडेको हो । यो नतिजा यस अवस्थामा सन् १९८७/८८ पछिकै सबैभन्दा खराब हो । त्यो बेला बार्सिलोनामा छैटौं स्थानमा ला लिगा सकाएको थियो र प्रशिक्षक टेरी भेनब्लेस चार खेलपछि नै बर्खास्तीमा परेका थिए ।
यस सिजन कोएमनको अन्डरमा बार्सिलोनाले अंक खराब रहेको छ ।
डिफेन्समा त्रुटी
यस सिजन बार्सिलोनाको डिफेन्समा ठूला त्रुटीहरु छन् जसले गर्दा गोलहरु निम्त्याएको छ । लिगको १० खेलमध्ये ६ खेलबाट बार्सिलोनाले पहिलो गोल व्यहोरेको छ र त्यो खेल जित्न सकेको छैन । कोएमनको टिमले जम्मा ३ खेलमा मात्र क्लिनसिट राख्न सफल भएको छ र कूल ११ गोल व्यहोरेको छ ।
ट्राभल सिकनेस
बार्सिलोनाले यस सिजनमा अहिलेसम्म खेलेको ५ अवे खेलमा १ खेल मात्र जितेको छ । जुन सेल्टाभिगोविरुद्ध बालाइडोसमा प्राप्त भएको थियो । क्याम्पनोउबाट अन्य यात्रामा निस्कँदा बार्सिलोनाले गेटाफे, एटेलेटिको र काडिजसँग हार व्यहोरेको छ भने अलाभेजसँग बराबरी खेलेको छ ।
आक्रमण कमजोर
गोल गर्ने मामिला बार्सिलोनाको सबैभन्दा प्रभावकारी पक्षको रुपमा रहेको छ । यस सिजन बार्सिलोनाले १० खेलमा २० गोल गरिसकेको छ । यद्यपि यदि अरु सिजनसँग तुलना गर्ने हो भने बार्सिलोनाको यो टिम त्यति प्रभावशाली छैन । यस सिजन बार्सिलोनाले हरेक ४५ मिनेटमा गोल गरेको छ, जुन १२ वर्ष यताकै खराब हो ।
यस्तै फिनिसिङको सवालमा कोएमनको टिमले औसतमा ३ सटमा एक गोल गर्यो जुन १३ वर्ष यताकै खराब हो ।
ला लिगामा पुनरागमन गर्दै राम्रो प्रदर्शन गर्न बार्सिलोनालाई अझै समय छ । च्याम्पियन्स लिगले बार्सिलोनालाई केही आशा जगाएको छ । यद्यपि प्रशिक्षक कोएमन भने आशावादी छैनन् । ‘लिग जित्ने अवसरबाट हामी धेरै पछाडि परिसकेका छौँ,’ काडिजसँगको हारपछि कोएमनले भनेका छन् ।
