ग्यासको कालोबजारी गरेको आरोपमा एकजना पक्राउ

३० मंसिर, काठमाडौं । ग्यासको कालोबजारी गरेको आरोपमा मोरङको विराटनगरबाट एकजना पक्राउ परेका छन् । पक्राउ पर्नेमा विराटनगर महानगरपालिका-१४ का मनिष यादव रहेका छन् । यादवले मलाहा रोडमा सञ्चालन गरेको फोटोकपी तथा ग्यास पसलबाट एउटा सिलिण्डरबाट अर्को सिलिण्डरमा ग्यास भर्दा कम तौलमा बिक्री गर्ने गरेको आरोपमा इलाका प्रहरी कार्यालय रानीबाट खटिएको प्रहरी टोलीले उनलाई मंगलबार पक्राउ गरेको हो ।

जिल्ला प्रहरी कार्यालय मोरङका प्रहरी नायव उपरीक्षक मानबहादुर राईका अनुसार उनको पसलबाट ठूलो ग्यास सिलिण्डर ११ थान, सानो ग्यास सिलिण्डर २ थान, तौल मेसिन १ थान, रेगुलेटर २ थान, एयर लिंक गर्ने पाइप १ थान समेत बरामद भएको छ ।

यादवलाई नियन्त्रणमा लिएर थप अनुसन्धान भइरहेको उनले बताए ।