गायक प्रकास सपूत, तेक्वान्दो खेलाडी संगीना बैद्य, अभिनेत्री सुरक्षा पन्त, स्ट्यान्ड अप कमेडियन सन्दिप क्षेत्री जब क्रिकेट मैदानमा उत्रनेछन्, उनीहरुबीचको घम्साघम्सी कस्तो हुन्छ होला ? फरक क्षेत्रमा परिचित यी अनुहारहरुले क्रिकेटमा आफ्नो क्षमता कसरी देखाउँलान् ?
उत्सुकता मेट्न माघ २४ गतेसम्मको मिति कुर्नुपर्नेछ । चितवनको भरतपुर महानगरपालिकास्थित निर्माणधिन गौतमबुद्ध अन्तर्राष्ट्रिय क्रिकेट रंगशाला यो रोचक भिडन्त साक्षतकार गर्न पाइनेछ । यसको मेलोमेसो मिलाएका छन्, गृष्मा ब्रोडकास्टिङले । गौतम बुद्ध अन्तर्राष्ट्रिय क्रिकेट रंगशाला निर्माण अभियानका लागि मैत्रिपूर्ण क्रिकेट प्रतियोगितामा तीन टिम रहनेछन् ।
‘स्टार क्रिकेट–२०२१’ शीर्षकको यो प्रतियोगिता यसकारण पनि घतलाग्दो हुनेछ कि, जहाँ क्रिकेटभन्दा बाह्र हात परका सेलिब्रेटीहरु आपसमा भिड्नेछन् । जस्तो कि, अभिनेत्री बेनिसा हमाल, गायक प्रमोद खरेल, तेक्वान्दो खेलाडी दीपक विष्ट । गायिका स्मिता दाहाल, फुटबलर हरि खड्का, अनिल गुरुङ, संचारकर्मी नरेश भट्टराई, तेक्वान्दो खेलाडी संगीना बैद्य, हास्य कलाकार कुमार कट्टेल, बडी बिल्डर महेश्वर महर्जन, अभिनेता अनुपबिक्रम शाही पनि यसमा सम्मिलित छन् । उसो त, क्रिकेटर पारस खड्का, ज्ञानेन्द्र मल्ल, विनोद दासले सेलिब्रेटी टिमको कप्तानी सम्हाल्नेछन् । उनीहरुसँगै सोमपाल कामी, दीपेन्द्र सिंह ऐरी, करण केसी जस्ता क्रिकेटर पनि मैदानमा उत्रनेछन् ।
रंगशाला निर्माण गरिरहेका धुमुर्स सुन्तली फाउन्डेसनका सीताराम कट्टेल र कुन्जना घिमिरे पनि यसमा छुट्ने कुरा भएन । समग्रमा क्रिकेटर, अभिनेता, अभिनेत्री, कमेडियन, फुटबलर, तेक्वान्दो खेलाडी, गायिका, संचारकर्मीबीच यो प्रतियोगिता हुनेछ ।
आयोजक गृष्मा ब्रोडकास्टिङका अध्यक्ष गृहेन्द्र घिमिरे भन्छन्, ‘यो नितान्त फरक र रोचक हुनेछ ।’ खासगरी निर्माणधीन रंगशालालाई सहयोग गर्ने उदेश्यले यस्तो प्रतियोगिता गर्न लागिएको उनको भनाई छ । उक्त खेलमा प्रयोग हुने बल, ब्याट, जर्सी लगायतका खेल सामग्री सेलिब्रेटीहरुको हस्ताक्षरसहित बिक्रीका लागि फाउन्डेसनलाई प्रदान गरिने योजना छ ।
