१३ पुस, काठमाडौं । नेपाल कम्युनिष्ट पार्टी (नेकपा) का अध्यक्ष पुष्पकमल दाहाल प्रचण्ड र माधवकुमार नेपाल पक्षका सात मन्त्रीले सामूहिक राजीनामा दिएपछि प्रधानमन्त्री केपी शर्मा ओलीले १० पुसमा मन्त्रिपरिषद् विस्तार गरे ।
शक्ति बस्नेतले राजीनामा दिएपछि रिक्त रहेको वन तथा वातावरण मन्त्रालयमा प्रेम आलेलाई ल्याइएको छ । डोटीबाट सांसद बनेका नवनियुक्त वनमन्त्रीको विगत भने धुमील छ ।
वन तथा वातावरण संरक्षणको जिम्मेवारी पाएका आलेलाई कुनै बेला वन विनाशको अभियोग लागेको थियो ।
डोटी जिल्ला साविक छतिवन गाविस–९ मा स्थायी घर भएका उनले सोही गाविसको वडा नम्बर ८ र ५ मा सल्लाको रुख काटेको मुद्दा अदालतमा पुगेको थियो । १० वैशाख २०५५ मा हालका मन्त्री आलेले साविक छतिवन–८ घर भएका राधेश्याम बडायरसँग मिलेर काठ तस्करी गरेको अभियोग पत्रमा उल्लेख छ ।
११ हजार क्यूफिट सल्ला तस्करी
मगर र बडायरले ११ हजार २३२.८४ क्यूफिट सल्ला काटेको अभियोग पत्रमा उल्लेख छ । वनरक्षक प्रेमबहादुर खड्काले उनीहरूलाई ८ लाख ९९ हजार रुपैयाँ जरिवाना माग गरेर मुद्दा दर्ता गरेका थिए ।
‘०५५ वैशाख १० गतेका दिन वन जंगल गस्ती गरि आउँदा छतिवन गाविस वडा नम्बर ८ बस्ने राधेश्याम बडायर र सोही गाविसको वडा नम्बर ९ बस्ने प्रेमबहादुर आले समेतले मिलमतो गरी छतिवन गाविस ८ र ५ को वन जंगलमा सल्लाको रुखहरू काटी टुक्राहरू बनाई राखेको पत्ता लागेको र काट्ने मानिस फेला नपरेकाले निजहरूलाई यसै रेन्जपोष्टबाट झिकाई घटनास्थल निरीक्षण गरी कारवाही गरिपाउँ’ वनरक्षक खड्को प्रतिवेदनमा भनिएको छ ।
बडायर पक्राउ परे पनि राजनीतिक संरक्षण पाएका आले फुक्काफाल रहे । १४ वैशाख २०५७ मा दुबै अभियुक्तले जिल्ला अदालतबाट सफाइ पाएका थिए ।
रोचक के छ भने प्रतिनिधिसभाको सार्वजनिक लेखा समितिले वैज्ञानिक वन व्यवस्थापन सम्बन्धी स्थलगत अध्ययन गर्न गठन गरेको उपसमितिमा पनि मगर नै सदस्य थिए ।
प्रदीप यादवको संयोजकत्वमा गठित समितिमा उनलाई सदस्य राखिएको थियो । आलेले भने आफूलाई रिसइबीका कारण वन मुद्दामा फसाएको दाबी गरेका छन् ।
संसद सचिवालयका एक अधिकारी भने काठ तस्करीका अभियुक्तलाई नै मन्त्री बनाउनु संयोग मात्रै नभएको बताउँछन् । उनी भन्छन्, ‘भक्षकलाई नै रक्षक बनाएर कसरी होला, हरियो वन, नेपालको धन ।’
