२४ पुस, काठमाडौं । राष्ट्रियसभाका सांसद रमेशजंग रायमाझीले प्रधानमन्त्री केपी शर्मा ओली राम्रो कामका लागि नभई नराम्रा कामका लागि इतिहासमा अविस्मरणीय रहने भएका छन् ।
शुक्रबार बसेको राष्ट्रियसभा बैठकमा बोल्दै सांसद रायमाझीले तानाशाहहरूलाई विश्वले नबिर्सने बताएका हुन् । ‘हिजो मात्रै एक जना माननीयज्यूले केपी ओलीलाई इतिहासले सम्झिरहनेछ भन्नुभएछ । हो, इतिहासले राम्रो काम गर्नेलाई पनि सम्झिन्छ, नराम्रो काम गर्नेलाई पनि सम्झिन्छ,’ उनले बैठकमा भने, ‘तानाशाहलाई झन् सम्झिन्छ, हिटलरलाई आज संसारले सम्झिन्छ ।’
सांसद खिमलाल भट्टराईले बिहीबार प्रधानमन्त्री ओलीले गरेका राम्रो कामका लागि नेपालीहरूले युगयुगसम्म सम्झिरहने बताएका थिए ।
प्रधानमन्त्रीले गरेको संसद् विघटन असंवैधानिक र अलोकतान्त्रिक भएको सांसद रायमाझीको भनाइ छ ।
