अलराउण्ड प्रदर्शन गरेका भुवन भन्छन्- रणनीतिमा सफल भयौँ

१५ माघ, काठमाडौं । भुवन कार्कीले अलराउण्ड प्रदर्शन गरेपछि प्रधानमन्त्री कप (पीएम कप) पुरुष राष्ट्रिय क्रिकेट प्रतियोगिताको पहिलो सेमिफाइनलमा एपीएफले नेपाल पुलिस क्लबलाई हराउँदै फाइनलमा स्थान बनायो ।

विभागीय डर्बीमा ३० रनको जित हात पार्दा भुवनले एपीएफका लागि दोस्रो धेरै रन बनाए भने सर्वाधिक ४ विकेट लिए । उनी खेलको म्यान अफ दि म्याच समेत बने ।

उनले ओपनिङ बलिङ गरे विकेट समेत लिए । साथै पुलिसको अन्तिम विकेट लिएर गेम समेत फिनिस गरे ।

त्यसअघि उनले टप अर्डर ब्याट्सम्यान नचल्दा सातौँ नम्बरमा ब्याटिङ गर्दै ४२ रन योगदान दिएका थिए । भुवनले ५६ बल खेल्दै १ चौका र २ छक्का समेत प्रहार गरे ।

यस्तै म्यान अफ दि म्याच भुवनले रणनीति अनुसार नै खेलेकाले सफल भएको बताए । उनले भने, ‘सेमिफाइनल म्याच हो, प्रेसर म्याच थियो । हामीले जुन योजना लिएर गएका थियौँ बीचमा केही बिग्रिए पनि लास्टमा सफल भएका थियौँ र खेल जित्यौँ ।’

उनले ४५ ओभरसम्म टिकेर खेल्ने र त्यसपछि रनको लागि जाने योजना रहेको र त्यही अनुसार खेलेको बताए । ‘ब्याटिङ ४५ ओभरसम्म रिक्स नलिई लैजाने योजना थियो। लास्टको ५ ओभर मात्र रनको लागि हेर्ने भनेर खेलेका थियौँ ।’

यस्तै आफू आउट हुँदा अर्धशतक नपुगेको भन्दा पनि टिमलाई रन चाहिएको अवस्था रहेकाले केही निराश भएको सुनाए । ‘आफू आउट हुँदा मेरो ५० भन्दा पनि रनको लागि हेरिरहेको थिएँ र रनको आवश्यकता परिरहेको थियो ।’

भुवनले आफू अनुभवी बलर भएको र पुलिसलाई सुरुदेखि दबावमा राख्न ओपनिङ बलिङ गरेको बताए । ‘खेलमा टार्गेट पनि कम थियो र अनुभवको आधारमा पनि म नै अनुभवी भएकाले सुरुदेखि नै उनीहरुलाई प्रेसरमा राखेर अघि बढ्ने योजना थियो । त्यसैले ओपनिङ बलिङ गरेँ ।’

भुवनले ब्याटिङमा जस्तै बलिङमा पनि पार्टनरसिप महत्वपूर्ण रहेको र पुलिसविरुद्ध कमल ऐरी र आफ्नो जोडीले काम गरेको बताए । ‘ब्याटिङ र बलिङ दुवैमा पार्टनरसिपको महत्व हुन्छ । कमल र मेरो पार्टनरसिप पनि जम्यो । उसले विकेट लिँदा मेले रन च्यापिरहेको हुन्छु मैले विकेट लिँदा उसले रन च्यापिएको हुन्छ ।’

यस्तै उनले आफ्नो चोट छिकै निको हुने समेत विश्वास व्यक्त गरे । ‘मलाई ह्याम्स्ट्रिङ इन्जुरी भयो, खुट्टा फर्किएर । आशा छ केही दिनमा ठिक होला,’ भुवनले भने, ‘ पछि फेरि मैदान फर्किएँ । बलर कम थियो । खेल महत्वपूर्ण थियो । उनीहरुको पार्टनरसिप भइरहेको थियो । फिजिकल्ली नसके पनि मानसिक रुपमा अनुभव प्रयोग गर्नुपर्छ भनेर फेरि बलिङ गर्न गएको थिएँ ।’