भारतको केन्द्रिय सरकारले भोलीदेखि हलहरुलाई पूर्ण अकुपेन्सीका साथ संचालनका लागि अनुमती दिएको छ । केही दिन अगाडि मात्र गृह मन्त्रालयले ५० प्रतिशत अकुपेन्सीमा चलचत्रि भवन संचालन गर्न दिने निर्णय परिवर्तन हुने बताएको थियो ।
शनिबार बेलुकी सूचना तथा प्रशारण मन्त्रालयले भारतका सम्पूर्ण हलहरुलाई पूर्ण क्षमताका साथ संचालन गर्न दिने निर्णय गरेको छ । भोली फ्रेवुअरी १ बाट भारतका सबै हलहरुले शत प्रतिशत दर्शक राख्न पाउनेछन् ।
तर, यसका लागि भने सरकारले तोकेको मापदण्ड प्रदर्शकले पालना गर्नुपर्नेछ । केन्द्रिय सरकारले पूर्ण क्षमतामा हल संचालनको अनुमती दिएपछि राज्य र केन्द्र शासित प्रदेशहरुले भने कोभिडको अवस्था हेरेर निर्णय लिन सक्नेछन् ।
हलमा पुग्ने दर्शकले सामाजिक दुरी पालना गर्नुपर्ने, अनिवार्य रुपमा मास्क लगाउनुपर्ने, थर्मल स्क्रिनिङ अनिवार्य रुपमा गर्नुपर्ने प्रावधान भने यथावत नै छ ।
सरकारले शत प्रतिशत अकुपेन्सीमा हल संचालन गर्न दिने निर्णय गरेसँगै चलचित्र निर्माता र प्रदर्शकका लागि ठूलो राहत मिलेको छ । पूर्ण क्षमता हल संचालनमा नआएका कारण बलिउडका महंगो बजेटमा बनेका चलचित्रले रिलिज मिति तय गर्न सकेका थिएनन् ।
केही साता अगाडि मात्र साउथको चलचित्र ‘मास्टर’ केही हलमा शत प्रतिशत अकुपेन्सीका साथ प्रदर्शनमा आएको थियो । बलिउडमा ‘सूर्यवंशी, ८३, राधे’ जस्ता बीग ब्यानरका चलचित्र रिलिजको क्रममा छन् ।
