टेलिग्राम बन्यो सबैभन्दा धेरै डाउनलोड हुने एप, ह्वाट्सएप खस्कियो

टिकटक तथा फेसबुक मातहतको इन्स्टेन्ट मेसेजि एप ह्वाट्सएप लगायतलाई पछाडि पार्दै क्लाउड बेस्ड मेसेजि एप टेलिग्राम विश्वमा सबैभन्दा धेरै डाउनलोड हुने एप बनेको छ ।

चालु वर्ष सन् २०२१ को जनवरी महिनामा नन गेमिङ एपतर्फ टेलिग्राम पहिलो नम्बरमा उक्लिएको हो ।

सेन्सर टावरको पछिल्लो तथ्यांक अनुसार जनवरी महिनामा टेलिग्राम एप विश्वमा ६ करोड ३० लाख पटक डाउनलोड भएको छ ।

स्मरण रहोस् सन् २०२० को डिसेम्बर महिनामा सर्वाधिक डाउनलोड हुने एपको पहिलो स्थानमा टिकटक थियो भने टेलिग्राम टप फाइभमा पनि थिएन ।

जनवरी २०२० मा भन्दा गत महिना टेलिग्राम एप ३.८ गुणा बढी डाउनलोड भएको छ ।

जनवरी महिनामा धेरै डाउनलोड हुने एपमा टेलिग्राम पछि दोश्रो स्थानमा टिकटक रहेको छ भने तेश्रो स्थानमा सिग्नल रहेको छ ।

त्यस्तै चौथो स्थानमा फेसबुकले आफ्नो स्थान सुरक्षित गर्न सफल भएको छ । ह्वाट्सएपको स्थानमा व्यापक गिरावट आएको छ र सर्वाधिक डाउनलोड हुने एपको सूचीमा पाँचौँ स्थानमा झरेको छ ।

सर्वाधिक डाउनलोड हुने नन गेमिङ एपको छैटौँ स्थानमा इन्स्टाग्राम छ भने सातौँ स्थानमा जूम रहेको छ । त्यस्तै आठौँमा एम एक्स टाका टाक, नबौँमा स्नापच्याट र दशौँ स्थानमा फेसबुक मेसेन्जर रहेको छ ।

सेन्सर टावरको पछिल्लो रिपोर्ट अनुसार जनवरी महिनामा टेलिग्राम एप भारतमा सर्वाधिक डाउनलोड भएको छ । विश्वमा भएको कूल डाउनलोड मध्ये भारतको हिस्सा २६ प्रतिशत रहेको छ । अर्थात् जनवरी महिनामा भारतमा डेढ करोड पटक टेलिग्राम डाउनलोड भएको छ । दोश्रो स्थानमा इण्डोनेसिया रहेको छ । कूल डाउनलोडमा इण्डोनेसियाको हिस्सा १० प्रतिशत रहेको छ ।

त्यस्तै जनवरी महिनामा विश्वमा ६ करोड २० लाख पटक टिकटक डाउनलो भएको छ । त्यसमा १७ प्रतिशत हिस्सा चीनको छ भने १० प्रतिशत हिस्सा अमेरिकाको छ । स्मरण रहोस् भारतमा टिकटक एप प्रतिबन्धित छ ।

प्राइभेसी नीतिमा बदलाव सँगै ह्वाट्सएप प्रयोगकर्ताको संख्या तिव्र गतिमा घट्दै जाँदा मेसेजिङ एप प्रयोगकर्ताहरु टेलिग्राम तथा सिग्नल लगायतका एपप्रति आकर्षित हुँदै गएका छन् ।

एजेन्सीको सहयोगमा