काठमाडौं । म्यानचेष्टर युनाइटेड र चेल्सीले प्रिमियर लिगमा बराबरी खेल्दै अंक बाँडेका छन् । आइतबार राति चेल्सीको घरेलु मैदान स्टानफोर्ड ब्रिजमा भएको खेल गोलरहित बराबरीमा सकिएको हो ।
दुवै टोलीले खेलमा गोलको अवसर पाएपनि गोल गर्न सकेनन् ।
बराबरीपछि युनाइटेड र चेल्सीले समान १ अंक जोडे ।
२६ खेलबाट ५० अंक जोडेको युनाइटेड लिग लिडर म्यानचेष्टर सिटीभन्दा अझै १२ अंकले पछि छ । यस्तै आर्सनलसँग ३-१ ले पराजित भएको लेस्टर सिटी भन्दा युनाइटेड १ अंकले अघि छ ।
समान खेलबाट ४९ अंकसहित लेस्टर तेस्रो स्थानमा छ ।
चेल्सी भने २६ खेलबाट ४४ अंकसहित पाँचौ स्थानमै छ ।
यस्तै अर्को लण्डन क्लब टोटनहम हट्सपरले बर्नलीलाई ४-० ले पराजित गरेको छ । टोटनहमका लागि गारेथ बेलले २ तथा ह्यारी केन र लुकास माउराले समान एक गोल गरे । बेलले खेलको दोस्रो मिनेट र ५५औं मिनेटमा गोल गरे । केनले १५औं र माउराले ३१औं मिनेटमा गोल गरे ।
जितपछि २५ खेलबाट ३९ अंक जोड्दै टोटनहम आठौं स्थानमा उक्लेको छ ।
