१७ फागुन, काठमाडौं । अस्ट्रेलियामा चीनको लगानी सन् २०२० मा ५ वर्षयताकै कमजोर अवस्थामा पुगेको छ । अस्ट्रेलियन नेशनल युनिभर्सिटीको तथ्यांकअनुसार गत वर्ष अस्ट्रेलियामा ७८ करोड डलर लगानी भित्रिएको थियो । सन् २०१९ मा अस्ट्रेलियामा चिनियाँ लगानी एक अर्ब ५७ करोड डलर थियो । २०१९ मा पनि अस्ट्रेलियामा चीनको लगानीमा ४७ प्रतिशतको कमी आएको थियो ।
पछिल्लो समय चीन र अस्ट्रेलियाबीच तनाव बढिरहेको अवस्थामा चिनियाँ लगानीमा उल्लेख्य कमी आएको तथ्यांक सार्वजनिक भएको हो । सन् २०२० मा केवल २० ओटा लगानी अस्ट्रेलिया भित्रिएका थिए । यो संख्या सन् २०१६ मा १११ ओटा थियो ।
विश्लेषकहरुले गत वर्ष विश्वभर नै लगानीमा कमी आएकाले त्यसको असर अस्ट्रेलियामा पनि देखिएको बताएका छन् । गत वर्ष अस्ट्रेलियाले मुलुकमा भित्रिले वैदेशिक लगानीका नियमहरु पनि परिवर्तन गरेको थियो । यसले पनि चीनबाट भित्रिने लगानीमा असर पारेको केहीले बताएका छन् ।
गत वर्ष अस्ट्रेलियाले कोरोना भाइरस (कोभिड–१९) को उत्पत्तिको विषयमा जाँच हुनुपर्ने माग गरेसँगै दुई मुलुकको सम्बन्ध चिसिन थालेको थियो । यससँगै चीनले केही अस्ट्रेलियाली सामग्रीमा दुई सय प्रतिशतसम्म अतिरिक्त भन्सार बढाउने निर्णय गरेको थियो ।
