२४ फागुन, काठमाडौं । शहीद स्मारक बी डिभिजन लिगको च्याम्पियन बन्ने पक्का भएको सातदोबाटो युथ क्लबको अपराजित यात्रा टुङ्गिएको छ । यसअघि नै ए डिभिजन लिगमा उक्लने पक्का भइसकेको सातदोबाटो सोमबार भएको खेलमा मध्यपुर युथ एसोसियसनसँग २-१ ले पराजित भएको हो ।
सातदोबाटोस्थित एन्फा कम्प्लेक्स सातदोबाटोमा मध्यपुरलाई जित दिलाउन कैलाश लामिछाने खत्री र सन्नी लामाले एक एक गोल गरे । सातदोबाटोका माल्डिना आङथुपुले एक गोल फर्काए ।
खेलको २९औं मिनेटमा कैलाशले गोल गर्दै मध्यपुरलाई अग्रता दिलाएका थिए । ५० औं मिनेटमा माल्डिनाले सातदोबाटोका लागि बराबरी गोल फर्काए । तर ५८ औं मिनेटमा सन्नीले गोल गर्दै मध्यपुरलाई २-१ को जित दिलाए ।
पराजित भएपछि १० खेलबाट २५ अंक जोडेर सातदोबाटो अंकतालिकाको शीर्ष स्थानमा छ । लिगमा अब हरेक टिमले एक एक खेल खेल्न बाँकी छ । खुमलटार युथ क्लब २२ अंकसहित दोस्रो स्थानमा छ । १३ अंक जोडेको मध्यपुर छैटौं स्थानमा उक्लिएको छ ।
यस्तै सोमबार भएको दोस्रो खेलमा पुल्चोक स्पोर्ट्स क्लबले रानीपोखरी कर्नर टिम आरसिटीलाई २-१ ले पराजित गर्दै लिगमा पहिलो जित हात पारेको छ ।
पुल्चोकका लागि अर्जुनकुमार राना र किस्मत लिम्बुले एक एक गोल गरे । आरसिटीका लागि अमर डंगोलले एक गोल गरे । अर्जुन रानाले पाँचौ मिनेटमा गोल गर्दै पुल्चोकलाई अग्रता दिलाएका थिए । ४३औं मिनेटमा अमरले आरसिटीका लागि बराबरी गोल फर्काए । तर ७७औं मिनेटमा किस्मतले गोल गर्दै पुल्चोकलाई लिगको पहिलो जित दिलाए ।
पहिलो जितपछि १० खेलबाट ५ अंक जोडेको पुल्चोक अन्तिम स्थानमै छ । झम्सिखेल युथ क्लब ६ अंकसहित ११औं स्थानमा छ ।
अब अन्तिम खेलमा पुल्चोकले नयाँबस्ती युथ क्लबसँग र झम्सिखेलले मध्यपुर युथ एसोसिएसनविरुद्ध खेल्नेछ ।
