१ चैत, काठमाडौं । नेपालमा पहिलो पटक आयोजना हुन लागेको फ्रेन्चाइज फुटबल प्रतियोगिता नेपाल सुपर लिग (एनएसएल) को टिम र टिम मालिकको घोषणा भएको छ । आयोजक नेपाल स्पोर्टस् म्यानेजमेन्टले आइतबार सोल्टी होटलमा एक कार्यक्रम गरी सात फ्रेन्चाइज टिम र टिम मालिकको घोषणा गरेको हो ।
देशका सात सहरको नामबाट ७ टिम र टिम मालिक सार्वजनिक गरिएको छ । फ्रेन्चाइज टिमहरुमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, पोखरा थण्डर्स, बुटवल लुम्बिनी फुटबल क्लब र धनगढी फुटबल क्लब रहेका छन् ।
फ्रेन्चाइज टिम मालिकहरुले एनएसएलमा सहरको प्रतिनिधित्व गर्दै सहभागी हुन पाउँदा उत्साहित रहेको बताए ।
एनएसएस आगामी वैशाख ११ देखि २५ गतेसम्म काठमाडौंको दशरथ रंगशालामा आयोजना गरिनेछ । सिंगल राउण्ड रोविन लिगका आधारमा एनएसएल हुनेछ ।
एनएसएसलाई अखिल नेपाल फुटबल संघ एन्फाले प्राविधिक सहयोग गर्नेछ ।
२०१९ जनवरी १ मा एनएसएस गर्ने घोषणा भएपनि त्यसको दुई वर्षपछि मात्रै यसले मूर्त रुप लिन लागेको हो । क्रिकेटमा जस्तै अब फुटबलमा पनि सहरको नामबाट टिम बनाएर खेलाडीको अक्सन गरेर एनएसएल आयोजना गर्न लागिएको हो ।
विदेशी खेलाडी समेत लिगमा समावेश हुने आयोजकले जनाएको छ । भारतीय कलाकार सोहेल खान गुडविल एम्बासडरको रुपमा रहने आयोजकले जनाएको छ ।
नेपाल स्पोर्टस् एण्ड ईभेन्ट म्यानेजमेन्टले भविष्यमा क्रिकेट, भलिबल लगायत अन्य खेलको पनि फ्रेन्चाईज लेभलको प्रतियोगिता गर्ने योजना बनाएको जनाएको छ । एन्फा अध्यक्ष कर्मा छिरिङ शेर्पाले एनएसएसले नेपाली फुटबलमा नयाँ इतिहास रच्ने बताए ।
‘यसले नेपाली फुटबललाई व्यवसायिकतातर्फ लैजाने विश्वास छ । नेपालमा चलिरहेको लिगलाई पनि व्यवस्थित गर्दै एनएसएललाई पनि अघि बढाइनेछ,’ शेर्पाले भने ।
फ्रेन्चाइज टिम र टिम मालिक
विराटनगर सिटी फुटबल क्लब (बीसीएफ)
अनुप रन्जन भट्टराई, अध्यक्ष बीसीएफ ।
काठमाडौं रेजर्स फुटबल क्लब
चिरञ्जीवी शाह, सीईओ यामाहा ।
ललितपुर सिटी फुटबल क्लब
कामना गुरुङ, निर्देशक, भाटभटेनी सुपर मार्केट ।
एफसी चितवन
सचिन ढकाल, चन्द्र ढकाल, हेमराज ढकाल, केमन ग्रुप ।
पोखरा थण्डर्स
निराकार श्रेष्ठ, लक्ष्मी ग्रुप ।
बुटवल लुम्बिनी एफसी
राजकुमार तिमल्सिना, भीमप्रसाद तिमल्सिना
धनगढी फुटबल क्लब
सुवास शाही ।