गोवाको अस्पतालमा उपचाररत २६ जनाको मृत्यु

२९ वैशाख, काठमाडौं । भारतको गोवास्थित एक सरकारी अस्पतालमा अक्सिजन अभावका कारण २६ जनाको मृत्यु भएको छ ।

गोवाका मुख्यमन्त्री प्रमोद सावन्तले केहीबेर अक्सिजन आपूर्ति रोकिँदा गोवा मेडिकल कलेजमा उपचाररत बिरामीहरुको मृत्यु भएको समाचार एजेन्सी पीटीआईलाई जानकारी दिएका छन् ।

यसैगरी स्वास्थ्यमन्त्री विश्वजीत राणेले मंगलबार बिहान २ बजेदेखि ६ बजेबीचको अन्तरालमा २६ जना बिरामीको मृत्यु भएको बताएका छन् । उनले बिरामीको मृत्युको कारण नखुले पनि अक्सिजनको अभाव नै भएको हुनसक्ने बताएका छन् ।

उनले यस घटनाको अनुसन्धान हुनुपर्ने बताएका छन् । अक्सिजन आपूर्तिसँग सम्बन्धित विषयमा एक श्वेतपत्र जारी गरेर वास्तविकता सार्वजनिक गर्नुपर्ने उनको भनाइ छ ।

यसअघि आन्ध्र प्रदेशको एक सरकारी अस्पतालमा अक्सिजन अभावका कारण १९ जना कोरोना संक्रमितको मृत्यु भएको थियो ।