८ जेठ, काठमाडौं । प्रधानमन्त्रीमा कसैको पनि दाबी नपुगेको भन्दै संसद विघटन गरी चुनावका जाने निर्णयकाविरुद्ध आक्रोशपूर्ण प्रतिक्रियाहरु आइरहेका छन् । कतिपयले कोरोना महामारीविरुद्ध लड्ने बेला अर्बौं रुपैयाँ खर्चेर चुनावमा जाने निर्णयको विरोध गरेका छन् । कतिपयले नहुने चुनावको घोषणा अनवरत शासन गर्ने सोचबाहेक केही नभएको प्रतिक्रिया दिएका छन् ।
केही भने फेरि यो मुद्दा सर्वोच्च अदालतमा जाने र सर्वोच्चले लिने निर्णयले नेपाली राजनीतिको भावी बाटो तय गर्ने अनुमान गरेका छन् । उत्तमबाबु श्रेष्ठले चुनावमा जाने निर्णयलाई राष्ट्रपति विद्यादेवी भण्डारी र प्रधानमन्त्री केपी शर्मा ओली गुटको कुर्सि लम्बाउने खेलको रुपमा लिएका छन् ।
उनले ट्वीटरमा लेखेका छन्, ‘चुनाव घोषणा बाहेक केपीसँग कुर्सि लम्बाउने अन्य उपाय सकिइसकेको थियो । दिउँसै भनेका थिए–मलाई विश्वास देउ, नत्र म चुनावमा जान्छु । चुनावमा भन्नेछन्– मलाई भोट देऊ नत्र म चुनाव गर्दिनँ । संकटको समयमा यो चुनावको घोषणा विद्याओली गुटको अनवरत शासन गर्ने सोच बाहेक केही होइन ।’
चुनाव घाेषणा बाहेक केपीसँग कुर्सी लम्बाउने अन्य सबै उपाय सकिइसकेकाे थियाे। दिउँसै भनेका थिए-मलाइ विश्वास देउ,नत्र म चुनावमा जान्छु। चुनावमा भन्नेछन्-मलाइ भाेट देउ, नत्र म चुनाव गर्दिन।संकटकाे समयमा याे नहुने चुनावकाे घाेषणा विद्याअाेली गुटकाे अनवरत शासन गर्ने साेच बाहेक केहि हैन।
— Uttam Babu Shrestha (@uttambabu) May 22, 2021
विवेकशील साझा पार्टीका अध्यक्ष रवीन्द्र मिश्रले सरकारको नेतृत्वको दाबी पनि अस्वीकृत भएका प्रधानमन्त्रीले संसद भंग गर्न मिल्छ ? भनेर प्रश्न गरेका छन् । यद्यपि प्रश्नहरु फेरि पनि सर्वोच्च अदालतमा ठोक्किएको भन्दै उनले सर्वोच्चले गर्ने निर्णयले भावी बाटो तय गर्ने बताएका छन् । उनले भूराजनीतिक चलखेल, आन्तरिक राजनीति र व्यक्तिहरुको महत्वाकांक्षाको असर सर्वोच्चमा नपरोस् भन्ने कामना पनि गरेका छन् ।
प्रश्नहरू फेरि गएर सर्वोच्च अदालतमा ठोकिएको छ। सर्वोच्च अदालतले संसद विघटनबारे यसपटक के निर्णय लिनेछ, अहिलेको स्थितिमा हेर्दा, त्यसले नै भावी बाटो तय गर्ने देखिन्छ। भूराजनीतिक चलखेल, आन्तरिक राजनीति र व्यक्तिहरूको महत्वाकांक्षाको असर सर्वोच्चमा नपरोस् भन्ने कामना गरौँ!
— Rabindra Mishra (@RabindraMishra) May 22, 2021
जनस्वास्थ्य विज्ञ डा. समीरमणि दीक्षितले भने कोरोना भाइरसविरुद्धको खोप विना चुनावमा जान नपाइने उल्लेख गरेका छन् । उनले ट्वीटरमा लेखेका छन्, ‘म राजनीति बुझ्दिनँ, तर विकसित घटनाक्रममा मेरो एकल माग : अधिकांश जोखिम समूह लगायतलाई विनाखोप चुनावमा जान पाइन्न ।’
कमल लामिछानेले चुनाव हुनेमा शंका व्यक्त गरेका छन् । उनले ट्वीटरमा लेखेका छन्, ‘यिनले नजित्ने चुनाव गराउन्नन् । गराइहाले पनि सहज सत्ता छोड्दैनन् ।’ पछिल्लो कदमलाई ‘विधि र नैतिकता नहुँदाको फल’ भनेर टिप्पणी गरेका उनले लेखेका छन्, ‘कमल थापाबाहेक अरुले यिनले गराउने चुनावमा धेरै आश नगरेको बेस ।’
लेखक मुमाराम खनालले कथित निर्वाचनको कुरा गरिएको टिप्पणी गरेका छन् । ओलीलाई कुनै पनि संस्थागत संरचनाका नियम, विधि र मर्यादाप्रति सरोकार र रुचि नभएको जिकीर गर्दै खनाल भन्छन्, ‘कथित निर्वाचन गर्ने कुरा त उनले बेसार पानी र बेलौतीको पातसमेत नखाइकन चट पार्नेछन् । होस गरौं ।’
विवेकशील साझा पार्टीका संयोजक मिलन पाण्डेले पछिल्लो कदमलाई संविधानको हत्या गर्ने र सत्ता कब्जा गर्ने षडयन्त्रको रुपमा बुझेका छन् । ‘यो नाङ्गो नाच हो । फेरि पनि प्रम र राप मिलेर राष्ट्रपति संस्था र संसद्को हत्या गरियो । प्रतिपक्षको दाबी आउनासाथ प्रधानमन्त्री हतार–हतार शितलनिवास पुगेर फेक दाबी गर्नु र दुवैको दाबी पुगेन भन्नु भनेको संविधानको हत्या गर्ने नियत हो । सत्ता कब्जा गर्ने षड्यन्त्र हो । हामी चुप बस्दैनौं,’ पाण्डेले लेखेका छन् ।
