७ असार, काठमाडौं । विद्युत् प्राधिकरणको लापरबाहीले एक जनाको मृत्यु भएको भन्दै स्थानीयले गरेको प्रदर्शन रोकिएको छ । इलाका प्रहरी कार्यालय, मेलम्चीमा आन्दोलनरत पक्ष, नगरपालिका र प्राधिकरणका प्रतिनिधिबीच भएको छलफल भएपछि प्रदर्शन रोकिएको हो ।
सोमबार बिहान मेलम्चीमा बाँध बनाउनका लागि एक्साभेटर लिन जाने क्रममा बिजुलीको तारमा छुँदा मेलम्ची नगरपालिका–११ का धर्मराज दुलालको मृत्यु भएको थियो । त्यसपछि स्थानीयले शव सडकमा राखेर विरोध प्रदर्शन गरेका थिए ।
दुवै पक्षबीच सहमति भएपछि अहिले शव उठाइएको र यातायात पनि सुचारु भएको सिन्धुपाल्चोकका प्रमुख जिल्ला अधिकारी अरुण पोखरेलले अनलाइनखबरलाई बताए । उनका अनुसार दुई पक्षबीच भएको छलफलबाट पीडित परिवारलाई प्राधिकरणले ५ लाख रुपैयाँ क्षतिपूर्ति दिने सहमति भएको छ ।
त्यस्तै, परिवारका एक सदस्यलाई अस्थायी जागिर दिने र सन्तानलाई नगरपालिकाले निःशुल्क पढाइदिने पनि सहमति भएको छ ।
