२२ असार, काठमाडौं । भारतमा कोरोना भाइरस (कोभिड–१९) का नयाँ संक्रमितको संख्या १११ दिनयताकै कममा झरेको छ ।
भारतको स्वास्थ्य तथा परिवार कल्याण मन्त्रालयका अनुसार पछिल्लो २४ घण्टामा भारतमा ३४ हजार नयाँ संक्रमित थपिएका छन् । यससँगै भारतमा कोरोनाबाट संक्रमित हुनेको समग्र संख्या तीन करोड ६ लाख १९ हजार नाघेको छ ।
त्यस्तै पछिल्लो २४ घण्टामा भारतमा कोरोना संक्रमणको कारण ५५३ जनाको मृत्यु भएको छ । यससँगै भारतमा कोरोना संक्रमणको कारण मृत्यु हुनेको संख्या पनि चार लाख ३ हजार २८१ पुगेको छ ।
पछिल्लो २४ घण्टामा भारतको केरलामा आठ हजारभन्दा धेरै नयाँ संक्रमित थपिएका छन् । त्यस्तै महाराष्ट्रमा नयाँ संक्रमितको संख्या ६ हजारभन्दा धेरै छ । तामिलनाडुमा तीन हजारभन्दा धेरै नयाँ संक्रमित थपिएका छन् ।
भारतमा कोरोनाका सक्रिय संक्रमितको संख्या पनि ४ लाख ६४ हजारमा झरेको छ । भारतमा अहिलेसम्म ३५ करोड ७५ लाख डोजभन्दा धेरै कोरोना खोप मानिसहरुलाई लगाइसकिएको छ ।
