Comments Add Comment

राजदूतहरुले भने : अब विदेशी पर्यटक आउँछन्, तयार रहनुस्

सिने पर्यटनका लागि हलिउडसँग पहल गरेका छौं : डा. युवराज खतिवडा

२३ असार, काठमाडौं । विभिन्न मुलुकमा नेपालको प्रतिनिधित्व गर्ने नेपाली राजदूतहरूले विश्वमा कोभिड-१९ विरुद्धको खोपको प्रभावकारितासँगै अन्तर्राष्ट्रिय पर्यटन आगमन सहज हुने बताएका छन् । पर्यटक आगमन बढ्ने भन्दै उनीहरुले नेपालमा तयारी अवस्थामा रहनसमेत आग्रह गरेका छन् ।

कोभिड-१९ का कारण लामो समयदेखि विश्वव्यापी रुपमा पर्यटकीय गतिविधि बन्द छ । तर, कोभिड-१९ विरुद्धको खोपको प्रभावकारिताले पर्यटकीय गतिविधिमा उत्साह थपिएको र त्यसलाई नेपालले पनि उपयोग गर्नुपर्ने उनीहरुको धारणा छ ।

नेपाल पर्यटन बोर्डले आगामी वर्षको बजेट सँगसँगै विश्वव्यापी रुपमा गर्न सकिने पर्यटकीय गतिविधि तथा विश्व परिवेशका सन्दर्भमा अमेरिका, क्यानडा र ब्राजिलका राजदूतहरुसँग बुधबार गरेको भर्चुअल अन्तर्क्रिया कार्यक्रम आयोजना गरेको छ ।

कार्यक्रममा उनीहरूले स्वास्थ्य सुरक्षाको मापदण्ड पालना गरेर विस्तारै पर्यटनलाई चलायमान बनाउन सकिने बताए । बोर्डले यसअघि कोभिड महामारीबीच पनि नेपालको पर्यटन प्रवर्द्धनका लागि के कसरी सहकार्य गर्न सकिन्छ भन्ने विषयमा केन्द्रित रहेर मध्यपूर्व,उत्तरपूर्वी एशिया र युरोपका विभिन्न देशका राजदूतहरुसँग पनि अन्तर्क्रिया कार्यक्रम गरिसकेको छ ।

कार्यक्रममा अमेरिकाका लागि नेपाली राजदूत डा. युवराज खतिवडाले छिमकी मुलुक भारत र चीन बाहेकका मुलुकहरुका लागि पनि पर्यटन बोर्डले छुट्टै प्रवर्द्धनात्मक क कार्यक्रम आयोजना गर्नुपर्ने बताए । पूर्व अर्थमन्त्री समेत रहेका डा. खतिवडाले संघीय सरकार, प्रदेश तथा स्थानीय सरकारहरूसँग समन्वय गरी बजेटको अभावलाई परिपूर्ति गरी कार्यक्रम गर्न सुझाव दिए ।

‘अहिले पर्यटकीय गतिविधि शून्यप्रायः रहकोले बजेट अभाव हुनु स्वाभाविक हो । तर प्रदेश र स्थानीय सरकारसँग पर्यटनका लागि बजेट छ । त्यसलाई प्रयोग गर्न सके बजेटको अभावलाई चिर्दै पर्यटनका थप काम गर्न सकिन्छ,’ उनले भने ।  यस्तै उनले नेपालमा स्वास्थ्य र सिने पर्यटनको पर्याप्त सम्भावना रहको भन्दै उनले सिने पर्यटनका लागि हलिउडसँग पहल गरिरहको दावी गरे ।

क्यानडाका लागि नेपाली राजदूत भृगु ढुङ्गानाले कोभिडको प्रभाव कम भएसँगै क्यानडाबाट पनि पर्यटकहरु भ्रमणमा निस्किरहेको भन्दै नेपालले स्वास्थ्य सुरक्षाको ध्यान दिँदै बाह्य पर्यटकलाई आर्कषित गर्नुपर्ने बताए ।

उनले पर्यटक आगमनमात्र नभएर पर्यटनमा वैदेशिक लगानी भित्र्याउने गरी दूतावासले पहल गरिरहेको र यसमा विभिन्न सरोकारवालाहरुसँग समन्वय र सम्पर्क भइरहेको जानकारी दिए ।

यस्तै ब्राजिलका लागि नेपाली राजदूतावासका डेपुटी चिफ अफ मिसन (सेकेन्ड सक्रेटरी) भरत  खनालले नेपालको पर्यटनको अन्तर्राष्ट्रिय प्रर्वद्धनका लागि विभिन्न भाषाका प्रचार सामग्री आवश्यक भएको बताए । उनले डिजिटल तथा परम्परागत दुवै खालका प्रर्वद्धनात्मक सामग्रीको उत्पादन र प्रचार गर्न बोर्डलाई सुझाव दिए ।

यस्तै न्युयोर्कस्थित नेपाली महावाणिज्य दूतावासका कार्यकारी कन्सुलर जनरल विष्णुप्रसाद गौतमले न्युयोर्कबाट नेपाल जाने पर्यटकको संख्या विगतका वर्षहरुमा बढ्दै गइरहको सन्दर्भमा नेपालको बारेमा सहि सूचना प्रवाह गर्न  सके यसलाई निरन्तरता दिन सकिने बताए ।

उनले विगतमा पर्यटन बोर्डले गराउने फ्यामट्रिपले नेपालको प्रचारमा सहयोग गरेकोले त्यहाँका विशिष्ट व्यक्तिहरुलाई नेपाल लैजाने गरी फ्यामट्रिपको व्यवस्था गर्न बोर्डलाई आग्रह गरे ।

पर्यटन बोर्डका कार्यकारी प्रमुख डा. धनन्जय रेग्मीले पर्यटनलाई चलायमान बनाउन नीतिगत सुधारदेखि अन्तरनिकाय समन्वय र बजेटको सीमिततालाई ध्यान दिँदै बोर्डले काम गरिरहेको जानकारी दिए । उनले नेपाललाई सबै उमेर समूह र सबै सिजनको पर्यटकीय गन्तव्यका रुपमा विकास गर्न नयाँ ढंगले गन्तव्य विस्तार आवश्यक भएको भन्दै त्यसका लागि बोर्डले हिमाल पहाड र तराईलाई समेट्ने गरी पर्यटकीय गन्तव्यको विकासमा लागेको जानकारी दिए ।

उनले कोभिडले गर्दा पहिले जस्तो अवस्था नभएपनि पुनरुत्थानका कार्यक्रकासाथ अघि बढ्नुको विकल्प नभएको र बताए । ‘अहिले अवस्था सजिलो पक्कै छैन सबैलाई जानकारी नै छ । तर कोभिडको दोस्रो चरणको संक्रमण र तेस्रो भेरियन्टको चर्चा हुँदै गर्दा स्वास्थ्य मापदण्डलाई ध्यान दिँदै सर्तकताकासाथ अघि बढ्नु पर्ने अवस्था छ । त्यसको लागि राजदूत र दूतावासको सहयोग आवश्यक छ’ उनले भने ।

यो खबर पढेर तपाईलाई कस्तो महसुस भयो ?

ट्रेन्डिङ

Advertisment