२९ असार, काठमाडौं । सेयर बजार परिसूचक नेप्से झिनो अंकले बढेको छ । नयाँ सरकार गठनसँगै बजेट र मौद्रिक नीतिबारे बढेको अन्योलताले लगानीकर्ता अलमलमा पर्दा नेप्से परिसूचक १.०१ अंक मात्रैले बढेको हो ।
बुधबार दोस्रो बजारमा २१४ कम्पनीको चार करोड ४७ लाख ३६ हजार ५३० कित्ता सेयर ५० हजार ५९१ पटक खरिद बिक्री हुँदा कारोबार रकम भने पाँच अर्ब ६५ करोड ४५ लाख रुपैयाँ पुगेको छ । जुन अघिल्लो दिनको तुलनामा झण्डै एक अर्बले बढी हो ।
बुधबार कारोबार भएका १३ उपसमूहमध्ये आठवटा उपसमूह घटेर राताम्मे रहे भने जलविद्युत, फाइनान्स, होटल, म्युचल फण्ड र लगानी उपसमूह भने झिनो अंकले बढ्यो ।
बुधबार हिमालयन पावर पार्टनर, नेपाल फाइनान्स, कालिका पावर कम्पनी र रसुवागढी हाईड्रोपावर कम्पनीको सेयर मूल्य पाँच प्रतिशतले बढ्यो । दोस्रो बजारमा बुधबार हिमालयन पावर पार्टनरको सेयर मूल्य ८.१० प्रतिशतले बढ्दा सो कम्पनीका लगानीकर्ताले उच्च नाफा कमाए भने नबिल ब्यालेन्स फण्ड दुई लगायतका लगानीकर्ताले बजारबाट दुई प्रतिशतको घाटा व्यहोरे ।
