२५ भदौ काठमाडौं । प्रिमियर लिगको शीर्ष स्थानमा रहेको टोटनहम हट्सपरले २०२१-२२ सिजनमा पहिलो हार बेहोरेको छ । यसअघि लगातार तीन खेल जितेको टोटनहम शनिबार क्रिस्टल प्यालेससंग पराजित भएको हो ।
क्रिस्टल प्यालेसले दश खेलाडीमा समेटिएको टोटनहमलाई ३-० ले पराजित गर्दै सिजनको पहिलो जित हात पार्यो । घरेलु मैदानमा क्रिस्टल प्यालेसलाई जिताउन ओडसन एडुवार्डले दुई गोल गरे भने विल्फ्रेड जाहाले एक गोल गरे ।
खेलको पहिलो हाफ गोलरहित बराबरीमा सकिएपनि दोस्रो हाफमा क्रिस्टल प्यालेसले तीन गोल गर्यो । ५८ औं मिनेटमा टोटेनहमका जाफेट टाङ्गांगा दोहोरो पहेँलो कार्ड पाउँदै मैदानबाट बाहिरिएपछि खेल मोडिएको थियो । जसको फाइदा क्रिस्टल प्यालेसले उठायो ।
खेलको ७६ औं मिनेटमा क्रिस्टल प्यालेसले पेनाल्टी पायो । त्यसमा जाहाले गोल गर्दै घरेलु टोलीलाई १-० को अग्रता दिलाए । ८४ औं मिनेटमा जाहाकै पासमा वैकल्पिक खेलाडीको रुपमा मैदान प्रवेश गरेका एडुवार्डले गोल गर्दै अग्रता दोब्बर पारे । एडुवार्ड ८४ औं मिनेटमै क्रिस्टियन बेनटेकेको स्थानमा मैदान प्रवेश गरेका थिए ।
एडुवार्डले नै इन्जुरी टाइममा व्यक्तिगत दोस्रो गोल गरेपछि क्रिस्टल प्यालेसले टोटनहमलाई स्तब्ध बनायो । यस सिजन पहिलो हारपछि पनि टोटेनहम ४ खेलबाट ९ अंकका साथ शीर्ष स्थानमा यथावत नै छ । पहिलो जितपछि क्रिस्टल प्यालेस भने ४ खेलबाट ५ अंक जोड्दै ११ औं स्थानमा उक्लेको छ ।
प्रतिक्रिया 4