कोपा च्याम्पियन अर्जेन्टिना र युरो च्याम्पियन इटलीबीच अर्को वर्ष खेल हुने

१२ असोज, काठमाडौं । कोपा अमेरिका च्याम्पियन र युरोकप च्याम्पियनबीच अर्को वर्ष खेल हुने भएको छ । दक्षिण अमेरिकी फुटबलको सर्वोच्च निकाय कन्मेबोल र युरोपियन फुटबलको सर्वोच्च निकाय यूईएफएले सन् २०२२ मा दुई महादेशको च्याम्पियनबीच खेल आयोजना गर्ने घोषणा गरेका हुन् ।

मंगलबार दुवै महादेशीय संघले सहकार्यलाई अझ अगाडि बढाउँदै च्याम्पियन टिमबीच खेल खेलाउने निर्णय गरिएको जनाएको छ । यसको अर्थ अब सन् २०२१ मा कोपा च्याम्पियन बनेको अर्जेन्टिना र युरो च्याम्पियन बनेको इटलीबीच अर्को वर्ष खेल हुनेछ ।

२०२२ को जुनमा इन्टरनेशनल विन्डोमा खेल हुने र मिति भने तय हुन बाँकी रहेको कन्मेबोलले जनाएको छ ।

कन्मेबोल र यूईएफएबीच दुई महादेशको विजेताबीच आगामी तीन संस्करणको खेल गर्ने सहमति भएको हो ।

२०२१ जुन जुलाईमा भएको कोपामा अर्जेन्टिनाले घरेलु टोली ब्राजिललाई हराउँदै उपाधि जितेको थियो । यस्तै इटलीले घरेलु टोली इंग्ल्याण्डलाई पेनाल्टी सुटआउटमा पराजित गरेर उपाधि जितेको थियो ।