एमालेले बागमतीमा बनायो ४७७ सदस्यीय प्रदेश कमिटी

१४ असोज, काठमाडौं । नेकपा एमालेको बागमती प्रदेश कमिटी ४७७ सदस्यीय बनेको छ । आनन्द पोखरेल अध्यक्ष र खेमप्रसाद लोहनी सचिव रहेको प्रदेश कमिटीलाई बिहीबार पूर्णता दिइएको छ ।

प्रदेश कमिटीको सूची बिहीबार नै पार्टी कार्यालयमा बुझाइएको अध्यक्ष पोखरेलले जानकारी दिए । उनकाअनुसार पदाधिकारी र केन्द्रीय सदस्यहरुको नाम भने प्रदेश कमिटीभन्दा माथि राखेर पठाइएको छ ।

जसमा अष्टलक्ष्मी शाक्यलाई उपाध्यक्ष र रामबहादुर थापा बादललाई इन्चार्ज भनिएको छ । सहइन्चार्जमा काशीनाथ अधिकारी, कृष्णगोपाल श्रेष्ठ, शेरबहादुर तामाङ र डोरमणि पौडेल छन् ।

१० बुँदे सहमति कार्यान्वयन गर्दा शाक्य प्रदेश इन्चार्ज हुनुपर्ने हो । तर अहिलेसम्म बादलले नै इन्चार्जको भूमिका निभाउँदै आएका छन् । यसबारे पोखरेल भन्छन्, ‘मैले मेरो मातहतको कमिटी बनाएको हुँ । केन्द्रीय कमिटीमा भएका नेताहरुको जिम्मेवारीबारे केन्द्रीय कमिटीले नै निर्णय गर्ला ।’