२१ असोज, काठमाडौं। अमेरिकी राष्ट्रपति जो बाइडन र चिनियाँ समकक्षी सि जिनपिङबीच भर्चुअल बैठक हुने भएको छ ।
एक वरिष्ठ अमेरिकी अधिकारीले दिएको जानकारीअनुसार सन् २०२१ को अन्तिमसम्ममा उनीहरुबीच बैठक हुनेछ । चीन र अमेरिकाबीचको तनाव कम गर्दै कूटनीतिक सम्बन्ध अघि बढाउन दुई मुलुकका प्रमुखबीच बैठक हुन लागेको हो।
द्विपक्षीय वार्ताको लागि प्रमुख विषयमा सहमति जुटेको नाम नबताउने शर्तमा एक अमेरिकी अधिकारीले बताएका छन् । यसअघि बाइडनले आफूले चिनियाँ समकक्षीसँग वार्ता गरेको र वार्तामा ताइवानको मुद्दालगायतका विषयमा कुरा भएको बताएका थिए। उनले ताइवान सम्झौता पालना गर्दै प्रतिबद्धता पनि व्यक्त गरेका थिए।
पछिल्लो समय ताइवानमाथि चीनले दबाब बढाएको छ । ताइवानले पश्चिमा मुलुकलाई आफ्नो पक्षमा उभिन निरन्तर आग्रह गर्दै आएको छ । अमेरिकाले पनि ताइवानलाई दबाब दिने चिनियाँ नीति विरोध गर्दै आएको छ ।
अमेरिकाले चीनलाई ताइवानमाथि सैन्य, कुटनीतिक र आर्थिक दबाब नदिन आग्रह गर्दै आएको छ । ताइवान, दक्षिण चीन सागर, मानवअधिकार, हङकङ सिन्जियाङलगायतका विषयमा अमेरिकाले चीनको व्यवहारको आलोचना गर्दै आएको छ ।
अमेरिकाले पछिल्लो समय चीनलाई घेर्ने केही गठबन्धन बनाएसँगै चीनले आपत्ति जनाउँदै आएको छ ।
एजेन्सीहरुको सहयोगमा
प्रतिक्रिया 4