सोसिडाड शीर्ष स्थानमा, अग्रता जोगाउन नसक्दा एट्लेटिको बराबरीमा रोकियो

१२ कात्तिक, काठमाडौं । रियल सोसिडाड स्पेनिस ला लिगाको शीर्ष स्थानमा उक्लिएको छ । साविक विजेता एट्लेटिको मड्रिड भने लेभान्टेसँग बराबरीमा रोकिएको छ ।

गएराति भएको खेलमा रियल सोसिडाडले सेल्टा भिगोलाई २-० ले हराएको हो । सोसिडाडको लागि अलेक्जान्डर आइज्याक र अरिट्ज एलुस्टान्डोले दोस्रो हाफमा गोल गरे ।

जितपछि ११ खेलबाट २४ अंक जोड्दै सोसिडाड शीर्ष स्थानमा उक्लिएको छ ।

यस्तै अर्को खेलमा एट्लेटिकोले दुई पटक अग्रता लिएर पनि कायम राख्न नसक्दा लेभान्टेसँग २-२ गोलको बराबरी खेल्दै अंक बाँडेको छ । खेलको १२ औं मिनेटमा एन्टोनियो ग्रीजम्यानले गोल गर्दै एट्लेटिकोलाई अग्रता दिलाएका थिए ।

तर ३७ औं मिनेटमा लेभान्टेका लागि एनिस बार्धीले पेनाल्टीमा बराबरी गोल फर्काए । ७६ औं मिनेटमा माथिउस कुन्हाले गोल गर्दै पुन: एट्लेटिकोलाई अग्रता दिलाए ।

तर ९० औं मिनेटमा लेभान्टेले अर्को पेनाल्टी पायो र त्यसमा एनिसले नै गोल गर्दै खेल बराबरी गरे । अन्तिम मसमया पेनाल्टीमा गोल बेहोरेपछि एट्लेटिको जितबाट बञ्चित भयो ।

लेभान्टेका रोबरले इन्जुरी टाइममा रातो कार्ड पाएका थिए । यस्तै ८० औं मिनेटमा एट्लेटिकोका प्रशिक्षक डिएगो सिमोनले दोहोरो पहेंलो कार्ड (रातो कार्ड) पाएका थिए ।

बराबरीपछि एट्लेटिको १० खेलबाट १९ अंक जोडेर छैटौं स्थानमा छ । लेभान्टे ११ खेलबाट ६ अंकसहित १९औं स्थानमा छ ।