काठमाडौं नजिकका वनभोज गन्तव्य : कति शुल्क, कति सुविधा ?

१६ मंसिर, काठमाडौं । हिउँद लागेसँगै काठमाडौं लगायत विभिन्न शहरी भेगबाट वनभोज (पिकनिक) जाने क्रम शुरु भएको छ । विभिन्न पिकनिक स्पटका सञ्चालकका अनुसार पुस, माघ र फागुन महिनामा काठमाडौं उपत्यका वरपरका पिकनिक स्पट भरिभराउ देखिन्छन् ।

पिकनिकको सिजन शुरु भएसँगै काठमाडौं उपत्यका आसपासका पिकनिक स्पटहरुमा धमाधम बुकिङ भइरहेको छ । विभिन्न स्थानका पिकनिक स्पट सञ्चालकहरुसँग कुराकानी गर्दा अधिकांश ठाउँमा निश्चित दर तोकिएको छैन । बार्गेनिङ र स्पटको आधारमा पिकनिक स्पटको मूल्य तोकिन्छ । तर केही पिकनिक स्पटले भने सबैखाले स्पटलाई एउटै दरमा दिने गरेका छन् ।

अधिकांश पिकनिक स्पटमा भने पानी र शौचालयको समेत अभाव देखिन्छ । हामीले काठमाडौं उपत्यका वरपर रहेका विभिन्न पिकनिक स्पटहरुको सुविधा, शुल्क र त्यहाँको सम्पर्क नम्बर समेत तल उल्लेख गरेका छौं ।

गोदावरी

ललितपुरको गोदावरी नगरपालिकामा पर्ने गोदावरी काठमाडौंबाट नजिकको पिकनिक गन्तव्य हो । करिब ८ किलोमिटरको दूरीमा रहेको यो ठाउँमा सरासर गाडीमा जाने हो भने करिब ३० मिनेटको बाटोमा पुग्न सकिन्छ । शान्त र हरियाली वातावरणमा वनभोजको मजा लिन सकिने यो ठाउँ धेरै काठमाडौंवासीको रोजाइको वनभोज गन्तव्य रहेको मानिन्छ । गोदावरीमा रहेका विभिन्न वनभोज स्थलहरुको सुविधा निम्नानुसार छ ।

पार्किङ – सडकमा

खानेपानी – पिउने र खाना बनाउने पानीको सुविधा

शौचालय – अपर्याप्त (अधिकांशमा शौचालय नै छैन)

पिकनिक शुल्क – ३०० रुपैयाँदेखि ७०० रुपैयाँसम्म

दोलालघाट

दोलालघाट काभ्रे जिल्लाको मुख्य पर्यटकीय क्षेत्रमध्ये एक हो । इन्द्रावती र भोटेकोशी नदीको किनारमा पर्ने यो क्षेत्र काठमाडौंबाट करिब ५० किलोमिटरको दूरीमा छ । सरासर गाडीमा जाने हो भने करिब डेढ घण्टामा पुगिने यो ठाउँमा बगरमा करिब एक दर्जनबढी वनभोज स्थलहरु रहेको दुलालेश्वर वातावरणीय तथा समाजसेवा क्लबका अध्यक्ष अष्टबहादुर श्रेष्ठ बताउँछन् ।

वनभोज स्थलका सुविधा

पार्किङ – पर्याप्त

खानेपानी – धाराको पानीको सुविधा

शौचालय – हरेक स्पटका लागि छुट्टाछुट्टै

अग्रिम बुकिङ – आवश्यक छैन

पिकनिक शुल्क – शुल्क निर्धारण गरिएको छैन । बत्ती र पानीको व्यवस्था गरिदिएबापत ५०० देखि ७०० रुपैयाँसम्म लिने गरिएको छ ।

सम्पर्क – ९८५१०३८६३३ (दुलालेश्वर वातावरणीय तथा समाजसेवा क्लबका अध्यक्ष अष्टबहादुर श्रेष्ठ)

पलाञ्चोक

काभ्रे जिल्लाकै अर्को ऐतिहासिक एवं पर्यटकीय क्षेत्र हो पलाञ्चोक भगवती । यहाँ ९ वटा पिकनिक स्पट छन् । काठमाडौंबाट ४७ किलोमिटरको दूरीमा रहेको यो क्षेत्रमा पुग्न सरासर गाडीमा जाँदा करिब एक घण्टा ४५ मिनेट लाग्छ ।

वनभोज स्थलका सुविधा

पार्किङ – सडकमा

खानेपानी – पिउने पानी किन्नुपर्ने, खाना पकाउन निःशुल्क

शौचालय – २ वटा पुरुष र २ वटा महिला

बिजुली – छ

कुल स्पट संख्या – ९

अग्रिम बुकिङ – एक हप्ताअघि बुकिङ गर्नुपर्ने

पिकनिक शुल्क – न्यूनतम २ हजारदेखि अधिकतम ३ हजार रुपैयाँसम्म

नगरकोट

नगरकोट काठमाडौं उपत्यका आसपासको अर्को पर्यटकीय क्षेत्र हो । यहाँ पिकनिक मात्रै नभएर अरु समयमा पनि धेरै पर्यटकहरुको भीड लाग्ने गर्छ । त्यस्तै, यहाँ पिकनिकको लागि पनि १० वटा पिकनिक स्पट छन् । आफ्नो खाली ठाउँमा वनभोज गर्न दिएर यसभन्दा बाहेक अरुले पनि पैसा असुल गर्ने गर्छन् । कोटेश्वरबाट २२ किलोमिटरको दूरीमा रहेको यो क्षेत्र पुग्न सरासर गाडीमा जाँदा करिब एक घण्टा लाग्छ ।

वनभोज स्थलका सुविधाहरु

पार्किङ – पर्याप्त

खानेपानी – सुविधा छ

शौचालय – २ वटा छ

कुल स्पट संख्या – १० वटा

पिकनिक शुल्क – ३ हजारदेखि ५ हजार रुपैयाँसम्म

त्रिभुवन पार्क

त्रिभुवन पार्कभित्र १५ वटा पिकनिक स्पटहरू छन् । जसमा १५० जनादेखि ४०० जनासम्म अट्ने क्षमता भएको स्पट रहेको पार्क व्यवस्थापनले जनाएको छ । कलंकीबाट ६ किलोमिटरको दूरीमा रहेको यो ठाउँ सरासर गाडीमा जाँदा करिब १६ मिनेटमा पुगिन्छ ।

वनभोज स्थलका सुविधा

पार्किङ – पर्याप्त

खानेपानी – खाना पकाउन निःशुल्क, पिउने पानी किन्नुपर्ने

शौचालय – हरेक स्पटका लागि छुट्टाछुट्टै

अग्रिम बुकिङ – पिकनिक आउने दिन बिहान बुकिङ गर्नुपर्ने

पिकनिक शुल्क – त्यहाँ मान्छेको क्षमता अनुसार १५ सय रुपैयाँदेखि ३५ सय रुपैयाँसम्मका स्पट भाडामा पाइन्छन् ।

सम्पर्क नम्बर – ९८२३७७८३३९

स्वीट्जरल्याण्ड पार्क

स्वीट्जरल्याण्ड पार्क चन्द्रागिरि नगरपालिकामा पर्ने काठमाडौंबाट नजिक रहेको पार्क हो । अग्लो ठाउँमा जंगलको बीचमा रहेको यो पार्कमा अन्यत्रको तुलनामा बढी सुविधा र एउटै शुल्क रहेको व्यवस्थापन पक्षले जनाएको छ । कलंकीबाट ७ किलोमिटरको दूरीमा रहेको यो ठाउँ सरासर गाडीमा जाँदा करिब २५ मिनेटमा पुगिन्छ ।

वनभोज स्थलका सुविधा

पार्किङ – सडक किनारामा

खानेपानी – पिउनको लागि किन्नुपर्ने, खाना पकाउन भाडाबाटै

शौचालय – ४ वटा महिला र ४ वटा पुरुषको लागि

अग्रिम बुकिङ – पर्दैन

पिकनिक शुल्क – सबै स्पटको लागि २७०० रुपैयाँ

सम्पर्क – ९८४९५९७८३३ (स्वीट्जरल्याण्ड पार्कका व्यवस्थापक)

धुलिखेल

धुलिखेल पनि व्यस्त पिकनिक स्पटमध्येकै एकमा पर्छ । काठमाडौंबाट छोटो दूरीमा पर्ने धुलिखेलको डाँडोमा रहेको यो पिकनिक स्पटमा शुक्रबार र शनिबार मात्रै दैनिक ३० वटा जति समूहले पिकनिक मनाउने गर्छन् । कोटेश्वरबाट २५ किलोमिटरको दूरीमा रहेको यो क्षेत्र सरासर गाडीमा जाँदा करिब ५५ मिनेटमा पुगिन्छ ।

वनभोज स्थलका सुविधा

पार्किङ – सडक किनारामा

खानेपानी – पिउनको लागि किन्नुपर्ने, खाना पकाउन भाडाबाटै

शौचालय – स्पटैपिच्छे छैन, ठाउँठाउँमा पाइन्छ

अग्रिम बुकिङ – शुक्रबार र शनिबारको लागि एक हप्ताअघि बुकिङ गर्नुपर्ने

शुल्क – थोरैमा २ हजारदेखि धेरैमा ७ हजार रुपैयाँसम्म । २०–२५ जनाको लागि २ हजार र ३०० जनाको हाराहारीमा पिकनिक मनाउन आउनेलाई ७ हजार रुपैयाँसम्म लिने गरिन्छ ।

सम्पर्क – सुमन रानाभाट देवीस्थान युवा क्लबका अध्यक्ष (९८१३०७४४९९)

चोभार गल्छी

चोभार काठमाडौंको चक्रपथबाट सबैभन्दा कम दूरीमा रहेको धेरैको रोजाइमा रहेको पिकनिक स्पट हो । बल्खुबाट चार किलोमिटरको दूरीमा रहेको यो क्षेत्र सरासर गाडीमा जाँदा करिब १५ मिनेटमा पुगिन्छ । यहाँको पिकनिक स्पट मञ्जुश्री पार्क व्यवस्थापनले सञ्चालन गर्ने गर्छ

त्यहाँको वनभोज स्थलका सुविधा यस्ता छन्

पार्किङ – पर्याप्त

खानेपानी – पिउनको लागि किन्नुपर्ने, खाना पकाउन नपर्ने

शौचालय – २ वटा

अग्रिम बुकिङ – एक हप्ताअघि

शुल्क – २ हजार र ३ हजार दरका दुई किसिमको स्पट

सम्पर्क – ०१४३३५९२५ मञ्जुश्री पार्क व्यवस्थापन