जन्मिएको २२ दिनपछि मर्‍यो ‘रामसारगज’

६ पुस, विराटनगर । कोशी टप्पु वन्यजन्तु आरक्षमा जन्मिएको छावा रामसारगज मरेको छ । मंसिर ११ गते जन्मिएको छावा रामसारगज आइतबार दिउँसो मरेको हो ।

५७ वर्षीया हात्ती शोभाकलीले जन्माएको छावाको मंसिर २२ गते न्वारन गरेर रामसारगज नाम राखिएको थियो। आइतबार माउसँगै चरणमा गएर फर्कने क्रममा लडेको रामसारगजको मृत्यु भएको कोशी टप्पु वन्यजन्तु आरक्षका धिकृत रामगुलाम चौधरीले बताए ।

उनका अनुसार आइतबार दिउँसो करीब २ बजे छावाको मृत्यु भएको र मृत्युपछि रामसारगजको अंग आरक्षको संग्राहलयमा राखिने छ । चौधरीका अनुसार पोष्टमार्टम गर्दा छावाको कलेजको सुन्निएको देखिएको थियो । पोष्टमार्टम रिपोर्ट  भने आउन बाँकी छ ।

गत मंसिर ११ गते शाभाकलीले हात्तिसार बाहिर छावा जन्माएकी थिइन् । छावा जन्माउने क्रममा माउले खुट्टा चलाउँछ । रामसारगजको मृत्युपछि माउको लाती लागेर कलेजो सुनिएको हुनसक्ने उनले बताए । ।

रामसारगजको मृत्‍युपछि शोभाकलीबाट छुटाउन माहुतेहरुलाई सकस परेको थियो । शोभाकलीको आँखा छोपेर मरेको छावालाई पोष्टमार्टमका लागि लगिएको थियो ।

मृत्युपछि शोभाकलीले छावा खोजिरहेको अधिकृत चौधरीले बताए ।