+
+

आइपुग्यो ५० लाख सिरिन्ज, अझै ७० लाख आवश्यक

कोभिड–१९ विरुद्धको खोपमा प्रयोग हुने ५० लाख थान सिरिन्ज नेपाल आइपुगेको छ ।

अनलाइनखबर अनलाइनखबर
२०७८ पुष ९ गते १८:३१
फाइल तस्वीर

९ पुस, काठमाडौं । कोभिड–१९ विरुद्धको खोपमा प्रयोग हुने ५० लाख थान सिरिन्ज नेपाल आइपुगेको छ ।

स्वास्थ्य सेवा विभागको आपूर्ति व्यवस्थापन शाखा प्रमुख सुरेन्द्र चौरसियाका अनुसार संयुक्त राष्ट्रसंघीय विशिष्ट एजेन्सी युनिसेफको अनुदान सहयोगमा उक्त परिमाणको सिरिन्ज शुक्रबार नेपाल आइपुगेको हो ।

प्राप्त सिरिन्जलाई बाराको पथलैयास्थित खोप भण्डारण केन्द्रमा राखिएको उनले बताए । सिरिन्ज प्राप्त भएसँगै अभाव देखिएका प्रदेशहरुमा पथलैयाबाटै वितरण गरिने उनको भनाइ छ ।

प्राप्त कोरोना खोपको अनुपातमा सिरिन्ज कम उपलब्ध हुँदा प्रदेश १ को खोप कार्यक्रम प्रभावित बनेको थियो । अन्य प्रदेशहरुले पनि सिरिन्ज सकिन लागेको रिपोर्टिङ खोप आपूर्ति शाखामा गराएका थिए ।

अझै ७० लाख सिरिन्ज आवश्यक

स्वास्थ्य सेवा विभागको तथ्यांक अनुसार १ करोड १८ लाख डोज कोरोना खोप भण्डारणमा छ ।शुक्रबार आएको सिरिन्जले हालको लागि खोप अभियान सञ्चालन गर्न सहज भएपनि अझै ७० लाख सिरिन्ज अझै आवश्यकता पर्ने चौरसियाको भनाइ छ ।

सरकारले चैतसम्ममा करिब २ करोड कोरोना खोप आउने पाइपलाइनमा रहेको जनाएको छ। ‘कोरोना खोप आउने क्रम जारी छ । तर, त्यस अनुपातमा हामीलाई सिरिन्ज उपलब्ध छैन,’ चौरसियाले भने, ‘सरकारले सिरिन्ज खरिदका लागि प्रक्रिया अगाडि बढाइरहेको छ।’

सरकारले युनिसेफबाट ६० लाख सिरिन्ज खरिद प्रक्रिया अगाडि बढाएको उनले बताए । तर, सिरिन्ज कहिलेसम्म आइपुग्छ भन्ने कुनै टुंगो छैन।

पाइपलाइनमा भएका खोपका लागि झण्डै २ करोड सिरिन्जको आवश्यक पर्ने चौरसियाले जानकारी दिए । शुक्रबार कोभ्याक्स सुविधा अन्तर्गत नेपालालाई ६ लाख ६४ फाइजर खोप उपलब्ध गराएको छ । तर, यो खोपमा प्रयोग हुने सिरिन्ज आइपुगेको छैन ।

फाइजर खोप प्राप्त भएपनि सिरिन्ज आइनपुगेकोले सरकारले काठमाडौं लगायत ८ जिल्लाका लागि १२ देखि १७ वर्ष सम्मका बालबालिकालाई १३ पुस देखि खोप दिने अभियान प्रभावित बनेको छ। चौरसियाले फाइजरका लागि चाहिने सिरिन्ज अर्को हप्तासम्म आइपुग्ने जानकारी प्राप्त भएको बताए।

यो खबर पढेर तपाईलाई कस्तो महसुस भयो ?

Khusi
                                chhu

खुसी

Dukhi
                                chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

छुटाउनुभयो कि ?