११ पुस, काठमाडौं । ‘स्पाइडर म्यान’ र ‘पुष्पा’को वर्चस्व रहेको समयमा रिलिज भएको नेपाली चलचित्र ‘चुरीफुरी’ले बक्स अफिसमा सुखद् शुरुआत गर्न सकेन । लामो समयसम्म हलमा देखिएको नेपाली चलचित्रको खडेरीलाई तोड्ने काम ‘चुरीफुरी’ले गरेपनि दर्शकको उपस्थिति भने फितलो देखिएको छ ।
ऋषिराज आचार्यको निर्देशनमा तयार भएको यो चलचित्रलाई देशका सबैजसो मल्टिप्लेक्सले निक्कै कम शो उपलब्ध गराएका थिए । तर, चलचित्र हेर्ने दर्शकले भने यसको कथावस्तुलाई मन पराएको निर्देशक ऋषिराज आचार्यले दाबी गरेका छन् ।
‘जति पनि दर्शकले चलचित्र हेर्नुभएको छ, यसको कथावस्तु र कमेडी पाटोलाई मन पराउनुभएको छ,’ उनले भने । चलचित्रको वर्ड अफ माउथ सुखद् भएकाले पनि आगामी दिनमा दर्शक बढ्ने अपेक्षा आचार्यको छ ।
चलचित्रमा अभिषेक श्रेष्ठ, पूजा पन्त, रविन्द्र झा, सोना बज्राचार्य, सुवोध गौतम, शिशिर भण्डारी, राजीवजंग गुरुङ लगायतका कलाकारको मुख्य भूमिका छ ।
मल्टिप्लेक्समा फितलो कमाइ गरेको यो चलचित्रले सिंगल थिएटरमा पनि औसत मात्रैकमाइ गरेको छ । यसैले चलचित्रले शुरुआती चरणमा नेपाली बक्स अफिसलाई खासै सुखद् सन्देश दिन सकेको छैन ।
प्रतिक्रिया 4