अमेरिकामा चार हप्ताभित्र झण्डै ३० लाख बालबालिका कोरोनाबाट संक्रमित

४ फागुन, काठमाडौं । अमेरिकामा गत चार हप्ताको अवधिमा कोभिड-१९ बाट झण्डै ३० लाख बालबालिका संक्रमित भएका छन् ।

ओमिक्रोन भेरियन्ट व्यापक बनेका बेला कोरोना भाइरसबाट संक्रमित हुने अमेरिकी बालबालिकाको संख्या नाटकीय रुपमा बढेको हो ।

अमेरिकाको एकेडेमी अफ पेडियाट्रिक्स एण्ड चिल्ड्रेन्स हस्पिटल एसोसिएसनको पछिल्लो रिपोर्ट अनुसार गत चार हप्तामा २९ लाखभन्दा बढी बालबालिका कोभिड-१९ बाट संक्रमित भएका हुन् । पछिल्लो तथ्याङ्कसँगै त्यहाँ महामारी सुरु भएयता कोरोना भाइरसबाट संक्रमित हुने बालबालिकाको संख्या एक करोड २३ लाख नाघेको छ ।

सोमबार अबेर सार्वजनिक गरिएको उक्त रिपोर्टमा अमेरिकामा जनवरीयता झण्डै ४५ लाख बालबालिकामा कोरोना संक्रमण पुष्टि भएको उल्लेख छ । रिपोर्टअनुसार सेप्टेम्बरको पहिलो हप्तादेखि करिब ७३ लाख बालबालिका भाइरसबाट संक्रमित भएका छन् ।