एनएसएलका लागि धनगढीले ट्यालेन्ट हन्ट गर्ने

२३ फागुन, काठमाडौं । साविक उपविजेता धनगढी एफसीले दोस्रो संस्करणको नेपाल सुपर लिग (एनएसएल) फुटबलका लागि २५ फागुनमा ट्यालेन्ट हन्ट प्रतियोगिता आयोजना गरेको छ ।

नेपाल स्पोर्ट्स एण्ड इभेन्ट म्यानेजमेन्टको आयोजनामा हुने एनएसएलको दोस्रो संस्करण २५ चैतमा सुरु हुँदैछ । त्यसका लागि सुदूरपश्चिम क्षेत्रका प्रतिभावान खेलाडी छनोट गर्ने उद्देश्यले ट्यालेन्ट हन्ट प्रतियोगिता आयोजना गरिएको क्लबले सोमबार विज्ञप्तिमार्फत जनाएको छ ।

ट्यालेन्ट हन्ट प्रतियोगिता धनगढीको फाप्ला मैदानमा हुनेछ । ट्यालेन्ट हन्टमा धनगढी एफसीका मुख्य प्रशिक्षक युगलकिशोर राई र मार्की प्लेयर विशाल राई पनि सहभागी हुनेछन् ।

यो प्रतियोगिताबाट धनगढी एफसीले एक जना खेलाडी नेपल सुपर लिगमा खेलाउनेछ । त्यसबाहेक उत्कृष्ट प्रतिभावान तीन जना खेलाडीलाई सुदूरपश्चिमकै प्रतिष्ठान एसपीए क्याम्पसमा छात्रवृत्ति समेत प्रदान गर्नेसमेत क्लबले जनाएको छ ।

गो ड्रिमर्स प्रालिको स्वामित्वमा रहेको हाम्रो धनगढी एफसीले ‘मार्की प्लेयर’ मा राष्ट्रिय टिमका मिडफिल्डर विशाल राई र मुख्य प्रशिक्षकमा युगल किशोर राईलाई निरन्तरता दिएको हो ।

यस्तै गत शुक्रबार भएको अक्सनबाट धनगढीले १५ खेलाडी पनि अनुबन्ध गरिसकेको छ ।