महामारीले छेकेन होटलमा लगानी, पाइपलाइनमा दुई दर्जन पाँचतारे

२५ फागुन, काठमाडौं । कोरोना भाइरसको महामारीले होटल उद्योगमा हुने दीर्घकालीन लगानीमा असर नगरेको पाइएको छ ।

संस्कृति, पर्यटन तथा नागरिक उड्डयन मन्त्रालय, पर्यटन विभागको तथ्यांक अनुसार नेपालमा अहिले दुई दर्जनभन्दा बढी पाँचतारे स्तरका होटल पाइपलाइनमा छन् । यीमध्ये केही निर्माणको चरणमा छन् भने केही निर्माणको पूर्वतयारीमा ।

सरकारको मापदण्डअनुसार काठमाडौं उपत्यकामा निर्माण हुने होटल पाँचतारे वर्गीकरणभित्र पर्न कम्तीमा १०० कोठा चाहिन्छ । उपत्यका बाहिर भने ८० कोठा भन्दा माथिको होटलले पाँचतारे मान्यता पाउँछ ।

पर्यटन विभागका अनुसार २७ वटा ठूलो क्षमताका होटल वातावरणीय प्रभाव मूल्यांकन (ईआईए)को प्रक्रियामा छन् । यीध्ये केहीले अनुमानित लगानी खुलाएका छन् भने कतिपयले खुलाएका छैनन् ।

आकर्षण अझै काठमाडौंमा

ईआईए प्रक्रियामा रहेका धेरैजसो होटेल काठमाडौं उपत्यकामा खुल्नेछन् । बाहिर रुपन्देही र बाँकेमा बढी आकर्षण देखिएको छ ।

रुपन्देही जिल्लामा नेपालको दोस्रो अन्तर्राष्ट्रिय विमानस्थल सञ्चालनमा आउन लागेको छ । बाँकेमा भने भारतीय पर्यटक लक्षित लगानी बढिरहेको छ । बाँकेमा क्यासिनो कल्चर फस्टाइरहेको छ ।

मानसरोवर जाने भारतीय पर्यटकको प्रवेशद्वार पनि हो, बाँकेको नेपालगञ्ज । पछिल्लो समय नेपालगन्जमा स्तरीय होटलमा लगानी बढिरहेको छ । काठमाडौं उपत्यकाबाहिर काभ्रेमा पनि होटलमा लगानी थपिने क्रममा छ ।

होटल संघ नेपाल (हान)का सदस्य युवराज श्रेष्ठ पर्यटकीय प्रडक्ट बिस्तार नभएसम्म बाहिर लगानीकर्ता हच्किने हुनाले बढी लगानी उपत्यकाभित्रै भएको बताउँछन् । यसकारण पर्यटकीय गतिविधिलाई देशभर बिस्तार गर्न सरकारलाई उनको सुझाव छ ।

पाइपलाइनमा रहेका अधिकांश होटलको लगानी २५ अर्ब रुपैयाँभन्दा माथि छ । ठूलो क्षमतामा होटल निर्माण गर्न विभागमा वातावरणीय प्रभाव मूल्यांकन (ईआईए) गर्न आएका कतिपय होटलले भने लगानी खुलाएका छैनन् ।

कतिपय होटलका ईआईए प्रतिवेदन कोरोनाकालभन्दा अगाडिको अनुमानमा आधारित भएकाले मूल्यांकनमा कम लागत देखिन्छ । विभागमा गैरआवासीय नेपाली संघका पूर्वअध्यक्ष शेष घलेको कम्पनीले बनाइरहेको शेराटन काठमाडौं होटलको अनुमानित लगानी ५ अर्ब रुपैयाँ मात्र खुलाइएको छ । कम्पनीले यो होटलमा १२ अर्ब रूपैयाँ लगानी हुने बताएको छ ।

ठमेलदेखि रारासम्म पाँचतारे होटल

वातावरणीय प्रभाव मूल्याकनमा आएका होटलको विवरण अनुसार ठमेलदेखि रारासम्म पाँचतारे होटल निर्माणको योजना छ । रारा राष्ट्रिय निकुन्जमा ‘रारा परियोजना’ले २२५ कोठाको होटल खोल्न ईआईए प्रक्रिया थालेको छ ।

चौधरी ग्रुपले झम्सिखेलमा १८० कोठाको सिजी होटल्स एण्ड रिसोर्ट खोल्ने प्रक्रिया थालेको छ । रुपन्देहीमा होटल पवन प्यालेसले १४१ कोठाको होटेल निर्माण गरिरहेको छ । काभ्रेको मण्डनदेउपुरमा १४९ कोठाको होटल द ब्लू माउण्टेन बन्दैछ ।

त्यस्तै, काठमाडौंको नक्सालमा होटल हिल्टन निर्माणको अन्तिम चरणमा छ । यसको लगानीकर्ता जगदम्बा हस्पिटालिटी हो ।

पाइपलाइनका पाँचतारे होटल

स्रोतः पर्यटन विभाग