१५ भदौ, काठमाडौं । नेपाल क्रिकेट संघ (क्यान) ले पहिलो पटक आयोजना गर्न लागेको नेपाल टी-२० लिगको ड्राफ्टका लागि करिब एक हजार खेलाडीले नाम दर्ता गराएका छन् । क्यानले गत शनिबार दर्ता खुला गरेको थियो । जस अनुसार ८०० स्वदेशी र २०० विदेशी खेलाडीले नाम दर्ता गरेका छन् ।
खेलाडी दर्ताका लागि क्यानले विभिन्न चार मापदण्ड राखेको थियो । जसमा सन् २०१८ देखि नियमित राष्ट्रिय स्तरको प्रतियोगिता खेलेको, नेपालको यू-१९ राष्ट्रिय टिमका लागि खेलेको, अन्तर्राष्ट्रिय प्रतियोगिता खेलेको र फ्रेन्चाइज क्रिकेट खेलेको खेलाडीलाई प्राथमिकता दिने उल्लेख छ ।
नेपाली खेलाडीको हकमा आज रातीसम्म खेलाडी दर्ताको समय रहेकोले अझै केही संख्या बढ्नसक्छ । यस्तै विदेशी खेलाडीको हकमा भने अझै केही दिन खेलाडी दर्ता गर्न पाइनेछ ।
नेपाल टी-२० लिग र अष्ट्रेलायमा हुने आईसीसी टी-२० विश्वकपको समय केही जुध्ने भएकोले विश्वकप खेल्ने टिमका खेलाडीहरु भने यसपटक उपलब्ध हुने छैनन् । त्यसबाहके अरु नाम चलेका खेलाडीहरुले समेत नेपालमा हुने लिगका लागि ड्राफ्टमा नाम दर्ता गराएका छन् ।
नेपाल टी-२० लिग असोज ८ देखि कात्तिक ५ गतेसम्म हुने तय छ । तर क्यानले अहिलेसम्म चार टिमको मात्र नाम घोषणा गरेको छ र दुई टिमको नाम सार्वजनिक हुनै बाँकी छ ।
क्यानले सेप्टेम्बर ६ अर्थात आउने मंगलबार खेलाडीको ड्राफ्ट गर्ने जनाएको छ । ड्राफ्ट अघि बाँकी दुई टिमको नाम सार्वजनिक गर्ने योजनामा क्यान छ ।
प्रतिक्रिया 4