+
+

बिग्रेको एटीएमबाट साडे १४ करोड निकालेर ५ महिनामै खर्च !

अनलाइनखबर अनलाइनखबर
२०७९ असोज १३ गते १२:५१

पेशाले एक रेष्टुरेन्ट बारमा बारटेन्डर रहेका एकजना युवक जब एकदिन आफ्नो खाता रहेको बैंकको एटीएममा पैसा निकाल्न गए तब बिग्रिएको एटीएमबाट ह्वारह्वार्ती पैसा निस्किन थाल्यो र उनले साढे १४ करोड रुपैयाँ बराबरको रकम प्राप्त गरे ।

माल पाएर चाल नपाउने भनेझैं तालुमा आलु फलेर प्राप्त गरेको कराडौं रुपैयाँ खर्च गर्न उनलाई पाँच महिना पनि लागेन ।

उनले त्यो रकम युवतीहरुसँग मोजमस्ती तथा पार्टीमै उडाए । उनले त्यो रकमलाई युवतीहरुसँग प्राइभेट जेटमा पार्टी गर्नमै खर्च गरे ।

हालै एक पडकास्टमा उनले उक्त घटनाको बारेमा खुलासा गरेका छन् । डान सान्डर्स नामका ती युवकले एटीएम मेसिनको प्राविधिक कमजोरीका कारण करोडौं रुपैयाँ हात पारेका थिए । तर, पाँच महिनामै मोजमस्तीमा उक्त करोडौं रकम खर्च गर्नु उनका लागि अभिशाप बन्यो । उनले जेल समेत जानु पर्‍यो ।

यद्यपि डानलाई उक्त घटनाप्रति कुनै दु:ख छैन । आफूले उक्त सबै रकम केवल पार्टीमा मात्र खर्च नगरी एकजना साथीको कलेजको शुल्क समेत तिरिदिएको बताउँछन् ।

आखिर एटीएम मेसिनबाट उनले कसरी करोडौं रकम प्राप्त गरे त ? यो कहानी पनि रोचक छ ।

डान अष्ट्रेलियाको वांगाराट्टामा बस्दछन् । उनी मदिरा पिउने उद्देश्यले घरबाट निस्किएका थिए । त्यसपछि पैसा निकाल्न उनी एटीएममा छिरे ।

उनले करिब १६ हजार रुपैयाँ बराबरको रकम निकाल्ने कोसिस गरेका थिए । तर एटीएम मेसिनको स्क्रिनमा कारोबार रद्द भएको मेसेज देखियो । उनले रकम निकाल्ने कोसिस फेरि गरे र अन्ततः नगद प्राप्त गरे ।

उनले उक्त घटनाको बारेमा धेरै सोचविचार गरेनन् तर घर फर्किपछि एकपटक पुनः पैसा निकाल्न एटीएम गए । त्यसपटक उनले १ लाख रुपैयाँ बराबरको रकम निकाल्ने कोसिस गरे ।। दुईतीन पटकको प्रयास पछि मात्र उनले उक्त रकम निकाल्न सफल भए ।

एकपटक एटीएमको स्क्रिनमा कारोबार रद्दको मेसेज देखियो तर उक्त मेसेजका बाबजुत एटीएम मेसिनबाट नगद निस्कियो । हरेक पटक पैसा निकाल्दा कारोबार रद्दको मेसेज देखिने तर नगद निस्किने र उनको अकाउन्टबाट रकम पनि कट्टी नहुने घटना दोहोरियो ।

डानले अर्को दिन बैंकमा फोनमा गरेर आफ्नो अकाउन्टमा कुनै गडबडी पो छ कि भनेर जान्ने प्रयास गरे ।

पछि डानले आफैं थाहा पाए कि रातको १ देखि ३ बजेसम्मको समयमा उक्त एटीएम रातको एकदेखि तीन बजेसम्मको समयमा बैंकको नेटवर्कबाट विच्छेद हुँदो रहेछ ।

उक्त समयमा आफूलाई चाहिएजति रकम एटीएमबाट निकाल्न सकिने मौका रहेको उनले थाहा पाए । त्यसपछि त डानले पटक-पटक गरी सोही समयमा थुप्रै रकम निकाले । उनी सहरका चर्चित रेष्टुरेन्टहरुमा जान्थे र पबमा मदिरा पिउने र मस्ती गर्नका लागि बेपरवाह रकम खर्च गर्दथे ।

छानबिनको क्रममा डानले बैंकको उक्त गल्तीको फाइदा उठाउँदै करिब साडे १४ करोड रुपैयाँ बराबरको रकम निकालेर खर्च गरेको पाइएको छ । त्यसमध्ये करीब ७० लाख रुपैयाँ उनले २० सिटे निजी जेट विमानमा महिला साथीहरुलाई घुमाउनका लागि खर्च गरेका थिए ।

द सनको रिपोर्ट अनुसार डानले एकपटक मिनी बस भाडामा लिए । त्यसपछि उक्त बसलाई मेलबर्नमा रहेका हरेक ब्याकप्याकर होस्टेलमा बस्ने मानिसहरुलाई बसालेर यारा भ्यालीमा लगी पूल पार्टीको आयोजना गरे ।

डानले करोडौँ रुपैयाँ एटीएमबाट निकालेर निस्फ्रिक्री खर्च त गरेका थिए तर उनको मनमा अपराधबोध थियो र कुनै दिन पक्राउ पर्छु भन्ने डर पनि थियो । त्यसपछि उनी चिन्ताले घेरिए र बिरामीजस्तो भएर आफ्नो डाक्टरकोमा परामर्शका लागि पुगे ।

उनले मनोचिकित्सकलाई सबै कुरा भने । डाक्टरले पनि उनलाई पुलिस समक्ष गएर आत्मसमर्पण गर्न सल्लाह दिए ।

तर उनले प्रहरीसँग सम्पर्क गर्नुको साटो सन् २०११ मा बैंकसँग सम्पर्क गरेर सबै कुरा बताए । बैंकका अधिकारीहरुले पनि यस विषयमा आफुहरुले पुलिसलाई सबै कुरा बताइसकेको जानकारी गराए । तर उनीमाथि बैंकले कुनै कारवाही गरेन । त्यसबीच डानको जीवनशैलीका बारेमा मिडियामा चर्चा हुन थाल्यो ।

त्यसको तीन वर्षपछि मात्र १११ वटा चोरी तथा धोकाधडीको अभियोगमा डानलाई प्रहरीले गिरफ्तार गर्‍यो । सन् सन् २०१६ को मे महिनामा उनी जेलमुक्त भए । जेलमुक्त भएपछि उनले पुनः बारमा काम गर्न सुरु गरे ।

एजेन्सी

यो खबर पढेर तपाईलाई कस्तो महसुस भयो ?

Khusi
                                chhu

खुसी

Dukhi
                                chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

धेरै कमेन्ट गरिएका

छुटाउनुभयो कि ?