+
+

कब्जियतकै कारण हुनसक्छ पायल्स

डा. सुवर्ण पौडेल डा. सुवर्ण पौडेल
२०७९ कात्तिक १७ गते १७:२४

अस्वस्थ पाचन, शारीरिक रूपमा कम सक्रिय हुनु, डिहाइड्रेसन, तनाव र गलत खाने बानी कब्जियतका प्रमुख कारण हुन् । कब्जियत यस्तो समस्या हो, जसले बिरामीको पेट राम्ररी सफा नहुनुका साथै शौच गर्दा धेरै समस्या हुन्छ । त्यसै कारण बिरामीले धेरै पटक शौच गर्न जानुपर्ने हुन्छ ।

ठीक ढंगले पेट सफा नहुनु, शौचमा समस्या हुनु, दिसा धेरै कडा हुनु र कम मात्रामा हुनु, पेटमा दुखाइ अनुभव हुनु कब्जियतका मुख्य लक्षण हुन् ।

कब्जियत किन हुन्छ ?

अस्वस्थ्यकर वा अपच खानेकुरा सेवन गर्ने, शारीरिक रुपमा निष्क्रिय बस्ने, तनावपूर्ण जीवन जिउनेहरुलाई कब्जियत हुनसक्छ । साथै, केही औषधिको सेवनले पनि कब्जियतको जोखिम हुन्छ ।

मैदाबाट बनेका, चिल्लो, तारे–भुटेका, पीरो, बढी मरमसला, गरम मसला, खुर्सानी खानाले पनि कब्जियत हुनसक्छ । माछा, मासु, अण्डा, दुग्धजन्य पदार्थको बढी सेवनले पनि कब्जियत हुने सम्भावना हुन्छ ।

जंक फुड, फास्ट फुड, चिया, कफी, कोल्ड ड्रिंक, तयारी पेय पदार्थ धेरै खाँदा चुरोट, खैनी, जाड, रक्सी जस्ता नसाजन्य पदार्थ खानाले पनि कब्जियतको जोखिम हुन्छ ।

आन्द्रामा ट्युमर पलायो र केही कारणले आन्द्रामा अवरोध भयो भने पनि कब्जियत  हुन सक्छ । दिसा–पिसाबलाई लामो समय रोकेर राख्नुहुँदैन । लामो समय दिसा पिसाब रोकेर राख्दा पनि कब्जियत हुनसक्छ ।

कब्जियत भएमा त्यसले कस्तो समस्या ल्याउँछ ?

लामो समय कब्जियत भइरह्यो भने वा पटकपटक कब्जियत भयो भने पछि पायल्सको समस्या हुनसक्छ । कब्जियत बारम्बार भइरह्यो भने मलद्वार सम्बन्धी समस्या पायल्स, फिसर फिस्टुला र ठूलो आन्द्रामा समेत समस्या हुन्छ  । कब्जियतकै कारण थाइराइड, सुगर र उच्च रक्तचापको लेबल पनि बढ्न सक्छ ।

बच्ने उपाय

कब्जियत खराब दिनचर्या र खानपानको कारण हुने गर्छ । त्यसैले सक्रिय जीवन बिताउनुपर्छ । शारीरिक श्रम गर्नुपर्छ । त्यही अनुसार स्वस्थ्य र सुपाच्य भोजन सेवन गर्नुपर्छ ।

कब्जियतको जोखिमबाट बच्न मैदाबाट बनेका खानेकुरा, चिल्लो, पीरो, तारेको, भुटेको र मसालेदार खानाको सेवन कम गर्नुपर्छ ।

जंक फुड, फास्ट फुड, बढी गर्मी गराउने खाना, चिया, कफी, कोल्ड ड्रिंक, तयारी पेय पदार्थको सेवन कम गर्ने र चुरोट, खैनी, जाड, रक्सी सेवन गर्नुहुँदैन । चोकरयुक्त खाना खाने, हरियो सागपात र फलफूल दैनिक रुपमा खाने र दैनिक तीन लिटर पानी पिउने बानीले कब्जियतको समस्या हुनबाट बचाउँछ ।

प्राकृतिक उपचार विधि

कब्जियतको प्राकृतिक उपचार विधि भनेको खानपान र जीवनशैली सुधार्ने नै हो । कब्जियतको समस्या कम गर्न एक दिनमा करिब ३–४ लिटर पानीको सेवन गर्ने बानी बसाल्नुपर्छ । खाना खानुभन्दा आधा घण्टाअघि वा पछि मात्र पानी पिउने बानी बसाल्नुपर्छ ।

प्रशस्त मात्रामा रेसायुक्त खानेकुराको सेवनले पनि कब्जियतबाट छुटकारा पाउन सकिन्छ । हरियो सागपात, फलफूल र सलादमा प्रशस्त मात्रामा फाइबर हुन्छ । त्यसैले दैनिक यस्ता खानेकुराको सेवन गर्नुपर्छ ।

चोकरयुक्त खानेकुराको सेवन र खानापछि सलादको सेवन गर्दा पनि कब्जियतको समस्या कम हुन्छ । दैनिक शारीरिक व्यायाम गर्दा पनि कब्जियतको समस्याबाट छुटकारा पाउन सकिन्छ ।

यी घरेलु उपाय अपनाउँदा पनि समस्या कम भएन भने चिकित्सकको सल्लाह लिएर दिसा खुलाउने औषधिको प्रयोग गर्नुपर्ने हुन्छ ।

(आयुर्वेदिक चिकित्सक डा. पौडेलसँग सुमित्रा लुइटेलले गरेको कुराकानीमा आधारित)

यो खबर पढेर तपाईलाई कस्तो महसुस भयो ?

Khusi
                                chhu

खुसी

Dukhi
                                chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

धेरै कमेन्ट गरिएका

छुटाउनुभयो कि ?