+
+
उम्मेदवार प्रोफाइल :

मोहम्मद इश्तियाक राई : २०७४ कै नियति

अनलाइनखबर अनलाइनखबर
२०७९ मंसिर १ गते १६:०८

२०३६ कात्तिकमा बाँकेमा जन्मिएका मोहम्मद इश्तियाक राई अहिले जनता समाजवादी पार्टी (पहिलेको मधेशी जनअधिकार फोरम, नेपाल)का केन्द्रीय कार्यकारिणी समिति सदस्य हुन् । उनी २०५३ सालमा राष्ट्रिय प्रजातन्त्र पार्टी (राप्रपा)मा लागेर राजनीतिमा आएका थिए ।

राई २०६२–६३ को जनआन्दोलनताका उपेन्द्र यादव नेतृत्वको मधेशी जनअधिकार फोरम (मजफो), प्रवेश गरे । त्यसको दुई वर्षभित्रै उनी पार्टीको केन्द्रीय सदस्य हुँदै सचिवालय सदस्य र केन्द्रीय सचिव भए । आन्दोलनका क्रममा पटक–पटक गिरफ्तार र पक्राउ परेर हिरासतमा बसे ।

राई २०६४ सालको पहिलो संविधानसभा निर्वाचनमा तत्कालीन मजफोको उम्मेदवार भएर बाँके २ बाट निर्वाचित भए । त्यसको दुई वर्षपछि २०६८ मा श्रम तथा यातायात व्यवस्था मन्त्री बने । २०७४ को संसदीय निर्वाचनमा सोही क्षेत्रबाट निर्वाचित भएर केपी ओली नेतृत्वको सरकारका शहरी विकास मन्त्री भए ।

ओलीले असंवैधानिक बाटोबाट विघटन गरेको संसद सर्वोच्च अदालतको आदेशबाट पुनस्र्थापित भएपछि शेरबहादुर देउवाको नेतृत्वमा गठन भएको सरकारमा पनि उनी केही महिना भौतिक पूर्वाधार विकास मन्त्री बने ।

राजनीतिशास्त्रमा स्नातकोत्तरसम्म अध्ययन गरेका मुस्लिम समुदायका राई नेपालगञ्जको शहरी विकास र बाँके जिल्लाको भौतिक पूर्वाधार क्षेत्रमा निकै ठूलो योगदान गरेको दावी गर्छन् । नेपालगञ्जमा धार्मिक–सांस्कृतिक सद्भाव फैलाउने अभियानमा पनि सक्रिय रहेको उनले बताए ।

चुनावी अंकगणित

२०७४ को चुनावमा दुई प्रमुख वाम दल नेकपा (एमाले) र नेकपा (माओवादी केन्द्र)ले गठबन्धन गरेको थियो । बाँके–२ मा वाम गठबन्धनका उम्मेदवार थिए पशुपतिदयाल मिश्र, जसलाई राईले ५ हजार ६२४ मतान्तरले पराजित गरे । राईले २१ हजार ५७५ र मिश्रले १५ हजार ९५१ मत पाएका थिए ।

२०७० को दोस्रो संविधानसभा निर्वाचनमा भने उनी एमालेका उम्मेदवारबाट पराजित भएका थिए । गत स्थानीय निर्वाचनको मतपरिणाममा यो क्षेत्रमा नेपाली कांग्रेस १८ हजार ३७ मतसहित अगाडि छ ।

त्यस्तै, एमालेसँग १५ हजार ४७८, जसपासँग १३ हजार ८०९, राप्रपासँग ८ हजार ४९४, माओवादी केन्द्रसँग ६ हजार ८५९, नेकपा (एकीकृत समाजवादीसँग ८२१ र जनमत पार्टीसँग ६९० मत छ ।

आउँदो ४ मंसिरमा हुने प्रतिनिधिसभा निर्वाचनमा राप्रपाका धवलशमशेर राणा र कांग्रेसका सुदीप नरसिंह राणा प्रतिस्पर्धामा छन् । यसपटक पनि राईले २०७४ कै नियति भोग्नुपरेको छ । अन्यत्र जसपा–एमालेको तालमेल छ, बाँके–२ मा एमालेले राप्रपालाई समर्थन गरेको छ ।

स्थानीय चुनावको नतिजा अनुसार सत्ता गठबन्धनका उम्मेदवार सुदीप राणासँग २५ हजार ७१७ मत छ भने एमालेको समर्थन पाएका धवलशमशेरको पक्षमा २३ हजार ९७२ । जसपाका उम्मेदवार राईसँग भने १३ हजार ८०९ मात्र छ ।

यसपटक यी दुई ठूला गठबन्धनलाई पल्टाएर जित निकाल्न राईले अघिल्लो पटक जस्तै लोकप्रियताको चमत्कार देखाउनुपर्नेछ ।

यो खबर पढेर तपाईलाई कस्तो महसुस भयो ?

Khusi
                                chhu

खुसी

Dukhi
                                chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

धेरै कमेन्ट गरिएका

छुटाउनुभयो कि ?