कांग्रेस संसदीय दलको निर्वाचन : मतदानमा ढिलाइ किन ?

६ पुस, काठमाडौं । नेपाली कांग्रेस संसदीय दलको नेता चयन गर्न आज बिहान आठ बजेदेखि मतदान सुरु गर्ने भनिए पनि पूर्वनिर्धारित समयमा सुरु हुन सकेन ।

केही सांसदहरुले भोट हाल्ने ठाउँसम्म मोबाइल लैजान पाउनुपर्ने माग गरेपछि पूर्वनिर्धारित समयभन्दा झण्डै एक घण्टा पछि मात्रै मतदान सुरु भएको हो । एक जना केन्द्रीय नेताले देउवा पक्षका सांसदहरुले भोट हाल्ने ठाउँसम्म मोबाइल लैजान पाउनुपर्ने माग गरेपछि मतदानमा ढिलाइ भएको बताए । नियमअनुसार भोट हाल्ने ठाउँमा मोबाइल लैजान निषेध छ ।

निर्वाचन समितिले आज बिहान ८ बजेदेखि १० बजेसम्म मतदानको समय निर्धारण गरेको थियो । मतदान गर्न सांसदहरु बिहानै सिंहदरबारस्थित संसदीय दलको कार्यालय पुगिसकेका छन् । तर मतदान सुरु नभएपछि उनीहरु अलमलमा परेका थिए ।

संसदीय दलको नेताको लागि पार्टी सभापति शेरबहादुर देउवा र महामन्त्री गगन थापा उम्मेदवार छन् ।

निर्वाचनस्थल कांग्रेस संसदीय दलको कार्यालयमा सुरक्षा व्यवस्था कडा छ । प्रहरीहरुले आगन्तुकको नामावली र उनीहरुको परिचयपत्र हेरेर मात्र भित्र प्रवेश गर्न दिएका छन् । पत्रकारहरुलाई पनि बाहिरै सडक पेटीमा रोकेर राखिएको छ ।