गण्डकीमा माओवादीबाट रेशम जुग्जालीलाई मन्त्री बनाउने निर्णय

९ माघ, पोखरा । नेकपा माओवादी केन्द्रले गण्डकी प्रदेश सरकारमा पार्टीको तर्फबाट सहभागी हुने मन्त्रीको टुंगो लगाएको छ ।

पोखरामा सोमबार बसेको संसदीय दलको बैठकले म्याग्दी प्रदेशसभा क्षेत्र (२) बाट निर्वाचित रेशमबहादुर जुग्जालीलाई सरकारमा पठाउने निर्णय गरेको हो । ३९ वर्षीय जुग्जाली माओवादी केन्द्र म्याग्दीको जिल्ला संयोजक हुन् ।

माओवादीको गण्डकी प्रदेश अध्यक्ष गायत्री गुरूङले पार्टीको गण्डकी प्रदेश संसदीय दलको बैठकले जुग्जालीलाई सरकारमा पठाउने निर्णय गरेको पुष्टि गरिन् । ‘म आफैं पनि दलको बैठकमा प्रदेश अध्यक्षको हैसियतमा पुगेकी थिएँ । जुग्जालीलाई मन्त्री बनाउने निर्णय भएको सत्य हो’, गुरूङले भनिन् ।

संसदीय दलका नेता हरिबहादुर चुमानले भने मन्त्रालय नै टुंगो नलागेकाले को मन्त्री जाने भन्ने पनि निर्णय नभएको दाबी गरे । जुग्जालीले पनि आफूलाई मन्त्री बनाउने निर्णय भएको बताए । ‘पार्टीको सिफारिसमा संसदीय दलको बैठकले सरकारमा पठाउने निर्णय गरेको छ,’ माआवादी केन्द्रका जुग्जालीले भने, ‘चुमान मन्त्री भइसक्नुभएको छ । अब एक जना पठाउँदा म मन्त्री भएर जाने निर्णय भयो । मन्त्रालयको टुंगो भने लागिसकेको छैन ।’

माओवादीका तर्फबाट यसअघि तनहुँ-२(२) बाट निर्वाचित हरिबहादुर चुमान विना विभागीय मन्त्री बनेका छन् । प्रदेश सरकारले सोमबार बिहान मन्त्रालयको संख्या १२ बाट घटाएर ७ वटा बनाउने निर्णय गरेको थियो ।

२५ पुसमा नियुक्त भएका मुख्यमन्त्री खगराज अधिकारीले सोही दिन माओवादीका चुमान, एमालेकी सीताकुमारी सुन्दास र राप्रपाका पञ्चराम गुरुङलाई मन्त्री नियुक्त गरेका थिए । सरकारमा सहभागी दलहरुबीच एमालेले ४, माओवादीले २ र राप्रपाले एक मन्त्री लिने समझदारी बनेको छ ।

माओवादीबाट जुग्जालीका अलावा गोरखाकी सुशीला सिम्खडा र माओवादीको चिह्नबाट चुनाव जितेका नेपाल समाजवादी पार्टीका फणीन्द्र देवकोटा मन्त्रीको आकांक्षी थिए ।

गत चुनावमा अपेक्षाकृत नतिजा हासिल गर्न नसकेको माओवादीले म्याग्दीमा भने गठबन्धनबाट दुईवटै निर्वाचन क्षेत्र जितेको थियो । समानुपातिकतर्फ पनि २०७४ को तुलनामा म्याग्दीमा माओवादीको मत बढेको थियो । सोही आधारमा म्याग्दीले सरकारमा सहभागिता पाउनुपर्ने दावी गरिएको थियो ।

मुख्यमन्त्री अधिकारी सरकार विस्तार र मन्त्रालय बाडफाँडलाई थाती राखेर सोमबार काठमाडौ गएका छन् । मंगलबारसम्म मन्त्रिपरिषद् विस्तारलाई पूर्णता दिने अधिकारीको तयारी छ ।

को हुन् जुग्जाली ?

मालिका गाउँपालिका वडा नम्बर ७ बिमका जुग्जाली माओवादी सशस्त्र युद्धमा भूमिगत भएका नेता हुन् । २०५८ मा पार्टीको जिल्ला सचिव भएका उनी २०६१ मा इलाका इञ्चार्ज भएका थिए । माओवादी सेनामा कम्पनी कमिसार हुदै बटालियन भाइस कमान्डर भएका उनी पार्टी शान्ति प्रक्रियामा आएपछि २०६३ मा वाइसीएलको जिल्ला सचिव र २०६६ मा माओवादीको तत्कालीन मगरात राज्य कमिटी सदस्य बने ।

माओवादी विभाजनपछि मोहन वैद्यसँगै पार्टी छाडेका जुग्जाली २०७४ को स्थानीय तह चुनावमा स्वतन्त्र उमेद्वार बनेर वडा अध्यक्षमा निर्वाचित भएका थिए । जुग्जाली पछिल्लो पटक माओवादीको जिल्ला संयोजकको जिम्मेवारीमा थिए ।

जुग्जाली २०७९ बैशाखमा भएको स्थानीय तह निर्वाचनमा माओवादी केन्द्रबाट मालिका गाउँपालिका अध्यक्षको उम्मेदवार बनेका थिए । तर पराजित भएका थिए ।