‘डा.गोविन्द केसीको हिजो मुद्दा सडकबाट उठाए, अब सदनबाट उठाउँछु’

माघ १३, काठमाडौं । चिकित्सा शिक्षा सुधारका अभियन्ता डा. गोविन्द केसीको मुद्दालाई अब सदनबाट उठाउने स्वास्थ्य तथा जनसंख्या राज्यमन्त्री डा. तोसिमा कार्कीले बताएकी छिन् ।

शुक्रबार स्वास्थ्य पत्रकार मञ्चले गरेको कार्यक्रममा सरकारले २०औ पटक अनसनमा गरेको सम्झौता सम्बोधन नभएको उल्लेख गर्दै मन्त्री कार्कीले अब सदनबाट आवाज उठाउने बताएकी हुन् ।

‘हिजो म आफैं सडकबाट आवाज उठाउँदै आएको थियो । आज सदनमा पुगेको छु । डा. केसी उठाउनु भएको सबै जायज मागलाई सम्बोधन गराउनेमा प्रतिबद्ध छु,’ मन्त्री कार्कीले भनिन् ।

डा. केसीले उठाएका स्वास्थ्य सेवा र चिकित्सा शिक्षा सुधारका हरेक जायज मुद्दालाई सम्बोधन गर्न प्रयासरत हुने उनको भनाइ छ ।

डा. केसीले उठाएका सबै अस्पतालमा न्यूनतम सेवा मापदण्ड लागू गर्ने, हरेक स्वास्थ्य संस्थामा दरबन्दी सुनिश्चित, देशको कुना–कुनमा जनताको सहज पहुँज पुग्ने गरी निःशुल्क औषधि उपलब्ध गराउने, प्रादेशिक अस्पतालले दिनुपर्ने विशिष्टकृत सेवा र सम्बन्धन पाएका मेडिकल कलेज सञ्चालन गर्न प्रयासरत रहेको उनले बताइन् ।

‘उहाँको एक-एक मागलाई प्राथमितामा राखेर काम सम्बोधन गर्न प्रयास गरिरहेको छु। त्यसका लागि अनौपचारिक रुपमा डा. केसीसँग चरणबद्ध रुपमा छलफल भइरहेको छ,’ डा. मन्त्री कार्कीले भनिन्।