सजिलै फुलाउन सकिने पेटुनिया फूल कस्तो मलमाटोमा रोप्ने ?

रोप्न सजिलो, स्याहार्न सजिलो, थरीथरी रंगका । अनि लामो समयसम्म फुल्ने । पेटुनिया काइदाको फूल हो । यो आयातीत फूल हो, दक्षिण अमेरिकाबाट भित्र्याइएको । यसको विभिन्न २० प्रजाति यहाँ पाइन्छन् । संसारमा सबैभन्दा सजिलै पहिचान फूलमध्येमा पर्छ, पेटुनिया ।

पेटुनिया फूल घाम लाग्ने वा घमाइलो ठाउँ मन पराउँछ । यो फूल वसन्तदेखि शरद् ऋतुसम्म ढकमक्क फुल्छ । यसका केही प्रजाति भने बाह्रैमास फुल्छ । पेटुनिया फूलको लागि बलौटे माटो एकदम राम्रो हुन्छ । पेटुनिया फूल रोप्नुअघि बलौटे माटोमा खरानी, हड्डीको धुलो, कम्पोस्ट मल र पिना मिसाएर गमला तयार गर्नुपर्छ ।

पेटुनिया फूल झाँगिएर जान्छ । बलौटे माटो खुकुलो हुने भएकाले जरा सजिलैसँग फैलिनका लागि यो उपयुक्त हुन्छ ।

पेटुनिया कति प्रकारका हुन्छन् ?

धेरै प्रकारका हुन्छन् पेटुनिया । उदाहरणका लागि जम्पो मिक्स, जम्पो फोरेस्ट, जम्पो स्टार, डबल पेटुनिया, हटोनिया र र्‍यामलिङ ।

पेटुनियाको विशेषता भनेको यसमा एउटै फूलमा धेरै रंग मिसिएर फुल्ने गर्छ । जसमा जम्पो मिक्समा एउटा मात्र रंगको फूल फूलछ भने जम्पो फोरेस्टमा एउटै फूलमा दुईवटा रंग र दुईवटा लेयर भएको हुन्छ ।

त्यस्तै जम्पो स्टारमा फूलको बीचमा स्टार आकार आएको हुन्छ । यसरी यसमा विभिन्न रंगका फूल हुन्छन् ।

कहाँ रोप्नुपर्छ ?

पिटुनिया आउटडोर प्लान्ट हो । यसलाई भुईंमा गमला वा ह्यांगिङ गमलामा पनि रोप्न सकिन्छ । धेरैजसो यो ह्यांगिङ गमलामा रोप्ने गरिन्छ । सिंगल वा डबल फूल फुल्ने पेटुनिया फूल रातो, सेतो, गुलाबी, बैजनी र हल्का नीलो रंगको हुन्छ । कालो र पहेंलो पेटुनिया फूल भने कम नै पाइन्छ ।

यो फूलको बीउ राखेको ६–७ दिनमा उम्रिन्छ । यो फूल रोपेको ४५ दिनमा फूल फुल्न सुरु हुन्छ ।

कसरी हेरचाह गर्ने ?

यसलाई पिना (तोरीको तेल पेल्दा निस्कने तोरीको बाहिरी भाग) र हड्डीको धुलो मिक्स गरेर बोटमा स्पेय गर्दा बोट सधैं हरियो राम्रो देखिने हुन्छ । यसलाई १५ दिनको फरकमा छर्कनुपर्र्छ । एक लिटर पानीमा पिना दुई भाग र हड्डीको एक भाग मिसाएर छर्कनुपर्छ, यसले बिरुवाको खानाको रुपमा काम गर्छ । यसले गर्दा धेरै फूल फुल्न मद्दत गर्छ ।

त्यस्तै जराको लागि नाइट्रोजन, पोटासियम र फस्फोरसको मिश्रण जरामा छर्कनुपर्छ । एक लिटर पानीमा यसलाई दुई एमएल राखेर बोटको जरा १५ दिनको एकपटक छर्कने गर्नुपर्छ, जसले जरालाई बलियो बनाउँछ ।

पेटुनियालाई रोपेपछि थोरै पानी दिंदा हुन्छ । दिनको एकपटक मात्र पानी दिए पुग्छ । यो बाह्रै महिना फुल्ने फूल भएपनि वर्षायाममा भने पानीबाट जोगाउनुपर्छ । पानी धेरै भएमा यो फूल सुकेर जान्छ ।

पेटुनियालाई बीउ विजन गरेर र कटिङ गरेर रोप्न सकिन्छ ।

कति मूल्य पर्छ ?

सामान्यतः नर्सरीहरुमा एउटा बोटको ४० रुपैयाँ पर्छ ।  ह्यांगिङ गमलासहित ३५० रुपैयाँ हाराहारीमा पर्छ ।

(कर्माचार्य भक्तपुरको सूर्यविनायकस्थित फ्लावर नेपालका सञ्चालक हुन् ।)