सिरहाको प्रादेशिक अस्पतालमा जेनेरेटरमा आगलागी, भागदौडमा एक बिरामीको मृत्यु

२९ चैत, जनकपुरधाम । प्रादेशिक अस्पताल सिरहाको जेनेरेटर आगलागी हुँदा डायालासिस गराइरहेका एक बिरामीको मृत्यु भएको छ । सिरहाको बरियारपट्टी गाउँपालिका– खोक्सीका ६५ वर्षीय प्रदीपकुमार दासको मृत्यु भएको अस्पतालले जनाएको छ ।

बुधबार दिउँसो डायलासिस वार्डको छेउमै राखिएको जेनेरेटरमा आगलागी भएपछि वार्डमा डायलासिस गराइरहेकाहरुबीच भागदौड मच्चिएको थियो ।

त्यस क्रममा डायालासिस गराइरहेका दासको रगत चढाइरहेको पाइप चुडिएपछि अत्यधिक रक्तश्राव भएको प्रत्यक्षदर्शी बिरामीहरुले बताएका छन् ।

अस्पतालका सूचना अधिकारी अशोक सिंह्यले भने दास पहिलेदेखि सिकिस्त रहेको र उनको उपचारको क्रममा मृत्यु भएको बताए ।

आगलागीका बेला डायलासिस, एचडियू, प्रसुति वार्ड लगायतमा भर्ना भएका बिरामीहरुबीच भागदौड मच्चिएको थियो ।