पुछारको खुमलटारले चौथो स्थानको सातदोबाटोलाई हरायो, मेसुकेको निर्णायक गोल

९ जेठ, काठमाडौं । शहीद स्मारक ए डिभिजन लिगमा मंगलबार पुछारको एफसी खुमलटारले चौथो स्थानको सातदोबाटो युथ क्लबलाई पराजित गरेको छ ।

दशरथ रंगशालमा भएको खेलमा मेसुके ओलोमोउको एक मात्र गोल मद्दतमा खुमलटारले छिमेकी सातदोबाटोलाई १-० ले पराजित गरेको हो ।

जितपछि २० खेलबाट २१ अंक जोडेको खुमलटार अन्तिम स्थानमै छ । अन्तिमबाट दोस्रोमा रहेको फ्रेण्ड्ससँग खुमलटारले अंक बराबरी गरेको भने छ ।

रेलिगेसन जोनमा रहेको फ्रेण्ड्स र खुमलटार भन्दा एपीएफ, एनआरटी र संकटा दुई अंकले मात्र अघि छन् ।

पराजित सातदोबाटोले भने तेस्रो स्थानको जावलाखेल युथ क्लबसँग अंक दूरी एकमा झार्ने मौका गुमायो र चार अंकले पछि छ ।

२० खेलबाट २९ अंकसहित सातदोबाटो चौथो स्थानमै छ । समान खेलबाट जावलाखेल ३३ अंक जोडेर तेस्रोमा छ ।

२०औं चरणको खेल सकिँदा चर्च ब्वाइज युनाइटेड ३७ अंकसहित शीर्ष स्थानमा छ र उपाधिहौडमा अघि छ ।

चर्च ब्वाइजलाई पछ्याएको साविक विजेता मछिन्द्र एफसी ३४ अंकसहित दोस्रो स्थानमा छ ।