संकटालाई राहत, खुमलटारलाई संकट

२१ जेठ,  काठमाडौं । शहीद स्मारक ए डिभिजन लिगमा संकटा क्लबले आइतबार एफसी खुमलटारलाई ३-० ले पराजित गरेको छ ।

एन्फा कम्प्लेक्समा भएको खेलमा संकटालाई जित दिलाउन निशान खड्काले १६औं, आयुष घलानले ३८औं र चन्दन दासले ७८औं मिनेटमा गोल गरे ।

यस जितले रेलिगेसन जोन भन्दा अगाडि रहेको संकटालाई राहत मिलेको छ अन्तिम स्थानमा रहेको खुमलटारलाई संकट परेको छ ।

२४ खेलबाट संकटा ३० अंक जोड्दै एक स्थान सुधार गरेर ११औं स्थानमा उक्लेको छ ।

आर्मी, एपीएफ र एनआरटीको पनि ३० अंक नै रहे पनि संकटा हेड टु हेडमा पछि छ ।

खुमलटार भने लिगमा दुई खेल बाँकी रहँदा २४ अंकसहित पुछारमा छ र रेलिगेसनबाट बच्न संघर्षरत छ ।

खुमलटारले अब रेलिगेसन टार्न अन्तिम दुई खेल जित्नैपर्नेछ भने अन्य टोलीको नतिजा पनि आफू अनुकल आउनुपर्नेछ ।