माण्डु हाइड्रोपावरको आईपीओ खुल्यो, क–कसले दिन पाउँछन् आवेदन ?

२८ असार, काठमाडौं । माण्डु हाइड्रोपावर लिमिटेडले प्राथमिक सेयर (आईपीओ) आवेदन खुला गरेको छ । कम्पनीले २८ असार बिहीबारदेखि प्रिमियममा मूल्यमा आयोजना प्रभावित क्षेत्रका स्थानीय बासिन्दा र वैदेशिक रोजगारीमा रहेका नेपालीहरुका लागि आईपीओमा आवेदन माग गरेको हो ।

कम्पनीले जारी पूँजी १ अर्ब ३६ करोड ३६ लाख ३७ हजार रुपैयाँको १२ प्रतिशतले हुने १६ लाख ३६ हजार ३७० कित्ता साारण सेयर निष्कासन गर्न नेपाल धितोपत्र बोर्डबाट स्वीकृति पाएको थियो । प्रतिकित्ता १०० रुपैयाा अंकित मूल्यमा १०६ रुपैयाँ प्रिमियम थप गरी २०६ रुपैयाँ प्रति कित्ताको दरले सेयर निष्कासन गर्ने स्वीकृति कम्पनीले पाएको हो ।

सार्वजनिक निष्कासन गर्न अनुमति पाएको मध्ये जारी पूँजीको २ प्रतिशतले हुने २ लाख ७२ हजार ७३० कित्ता सेयर आयोजना प्रभावित क्षेत्रका स्थानीय बासिन्दाहरुका लागि निष्कासन गर्न कम्पनीले आवेदन खुला गरेको छ । उक्त सेयरमा ललितपुरको बागमती गाउँपालिका– १ र २, मकवानपुरको भीमफेदी गाउँपालिका–५, ६, ७ र ८ तथा ईन्द्रसरोबर गाउँपालिका–३ का स्थानीय बासिन्दाहरुले आवेदन दिन सक्नेछन् ।

यसका साथै कम्पनी सर्वसाधारण लगानीकर्ताहरुका लागि छुट्याइएको सेयरको १० प्रतिशतले हुन आउने १ लाख ३६ हजार ३६४ कित्ता साधारण सेयर नेपाल सरकारको सम्बन्धित निकायबाट श्रम स्वीकृति प्राप्त गरी विदेशमा रोजगार गरी रहेका नेपालीहरुका लागि आवेदन माग गरेको छ ।

कम्पनीको आईपीओमा न्यूनतम १० कित्ताका र अधिकतममा ५० हजार कित्ता सेयरका लागि आवेदन दिन सक्नेछन् । आयोजना प्रभावित क्षेत्रका स्थानीय बासिन्दाहरुले कम्पनीको आईपीओमा छिटोमा ११ साउन र उक्त अवधिमा माग अनुसार आवेदन नपरेमा आवेदन दिने अवधि २६ साउनसम्म लम्बिनेछ ।

वैदेशिक रोजगारीमा रहेका नेपालीहरुले भने ११ साउनभित्र आवेदन दिनु पर्नेछ ।

वैदेशिक रोजगारीमा रहेका नेपालीहरुले नेपाल धितोपत्र बोर्डबाट स्वीकृति प्राप्त गरेका सम्पूर्ण सी–आस्बा सदस्य बैंक तथा वित्तीय संस्थाहरुबाट र सीडीएस एण्ड क्लियरिङको ‘मेरो सेयर’ अनलाइन प्रयोग गरी सी–आस्बा प्रणाली मार्फत आवेदन दिन सक्नेछन् ।

कम्पनीले आईपीओ निष्कासनका लागि गराएको रेटिङमा इक्रा नेपालले ‘इक्रा एनपी इस्यूअर रेटिङ ट्रिपल बी माइनस’ प्रदान गरेको छ । यसले कम्पनीको वित्तीय दायित्व बहन गर्ने क्षमतामा औसत जोखिम रहेको संकेत गर्दछ ।

कम्पनीको सेयर निष्कासन तथा बिक्री प्रबन्धक प्रभु क्यापिटल लिमिटेड रहेको छ । स्थानीय बासिन्दाले आयोजना स्थल, कुमारी बैंक, प्रभु बैंक तथा प्रभु क्यापिटलका तोकिएका शाखा कार्यालयबाट आवेदन दिन सक्नेछन् । यसका साथै प्रभु क्यापिटलको अनलाइन लिंकमार्फत पनि आवेदन दिन सक्नेछन् ।

कम्पनीले हाल बागमती साना जलविद्युत आयोजना सञ्चालन गरिरहेको छ । २२ मेगावाटको उक्त कुल लागत ४ अर्ब १ करोड ९४ लाख ३७ हजार २५८ रुपैयाँ रहेको छ भने प्रतिमेगावाट कुल लागत १८ करोड २७ लाख रुपैयाँ रहेको छ ।