पार्टीमा निर्णय गर्दा प्रक्रिया पूरा नगरे गुनासोबाहेक केही हुन्न : सिंह

५ साउन, काठमाडौं । नेपाली कांग्रेसका नेता प्रकाशमान सिंहले पार्टीले निर्णय गर्दा प्रजातान्त्रिक प्रक्रिया पूरा नगरे गुनासो बाँकी रहिरहने बताएका छन् ।

केन्द्रीय समितिको बैठकमा बोल्दै सिंहले विधान नियमअनुसार चल्नुपर्ने कुरा आफूले १०औं महाधिवेशनदेखि गर्दै आएको सुनाए । पार्टीमा समस्या भयो भनेर मात्र नहुने भन्दै अब विधानले निर्देशित गरेका सबै काम गरेर अघि बढे मात्रै समस्या समाधान हुने बताए ।

नागरिकका पक्षमा पार्टीको प्रभावकारीता देखाउने र कार्यकर्तालाई चित्त बुझ्ने बनाउन विधानअनुसार चल्नुपर्ने बताए । ०४६ पछिको राजनीति सत्ता केन्द्रीत भएको सिंहले बताए ।

पार्टीको घोषणापत्र अनुसार काम नभएकोतर्फ सिंहले ध्यानाकर्षण गराए । पार्टीबाट बनेका जनप्रतिनिधि र पार्टी संरचनाबीचको समन्वयको समस्या देखिएको बैठकका सिंहले बताए ।