एन्फा बैठकका लागि ९ एजेन्डा थप

१६ साउन, काठमाडौं । अखिल नेपाल फुटबल संघ (एन्फा) को १९ साउनमा बस्ने केन्द्रीय कार्यसमिति बैठकका लागि ९ एजेन्डा थप गरिएको छ ।

केन्द्रीय सदस्यहरुले एजेन्डा थप गर्न माग गर्दै निवेदन दिएपछि एन्फाले ९ बुँदा थप गरेर यसको जानकारी मंगलबार केन्द्रीय सदस्यहरुलाई गराएको छ ।

केन्द्रीय सदस्य रवीन्द्र चन्दले ६, रुपेश अधिकारी पेमा डोल्मा लामाले ५-५ तथा अनिल मल्लले ३ बुँदा थप गर्न माग गर्दै निवेदन दिएका थिए ।

तर चन्द र अधिकारीले थप गर्न माग गरेको गत फागुन १७ गते बसेको कार्यसमिति बैठकको निर्णय उपर छलफल, कतार विश्वकप २०२२ को टिकट र आन्तरिक अडिट रिपोर्ट तथा मल्लले माग गरेको एन्फा महासचिव बर्खास्ती सम्बन्धी एजेन्डा भने थप गरिएको छैन ।

चन्द, अधिकारी र मल्लले थप गर्न माग गरेकोमध्ये २-२ एजेन्डा समावेश गरिएको छ । यस्तै पेमा डोल्माले थप गर्न माग गरेको पाँच वटै एजेन्डा थप भएको छ ।

९ बुँदा थप गरिएपछि अब कूल एजेन्डा २० पुगेको छ । यसअघि एन्फाले विधिसहित ११ एजेन्डामा छलफल हुने जनाएको थियो ।

एन्फा बैठकका लागि थप गरिएको ९ वटा एजेण्डा

१. सांगठानिक संरचना र कर्मचारी सम्बन्धमा ।

२. एन्फा बजेट २०८०/०८१ सम्बन्धमा ।

३. अखिल नेपाल फुटबल संघको विधान संशोधन बारे ।

४. नेपाली राष्ट्रिय पुरुष फुटबल टिम र महिला राष्ट्रिय फुटबल टिमको समान पुरस्कार राशीबारे ।

५. एन्फा महिला एकेडेमी संचालनबारे ।

६. महिला राष्ट्रिय टिमको नकआउट प्रतियोगिताबारे ।

७ महिला रेफ्रि तथा प्रशिक्षकको संख्या वृद्धिको लागि रणनीतिबारे ।

८. महिला तथा पुरुष राष्ट्रिय खेलाडीहरुको पुरानो बाँकी पुरस्कारबारे ।

९. नयाँ सदस्य जिल्ला फुटवल संघ गठनबारे ।