२१ साउन, काठमाडौं । प्रिमियर लिग फुटबलको नयाँ सिजन सुरु हुनुअघि हुने कम्युनिटी शिल्डको उपाधिका लागि आर्सनल र म्यानचेष्टर सिटी भिड्दैछन् ।
प्रिमियर लिग र एफ कप च्याम्पियनले नयाँ सिजनअघि यो खेल खेल्छन् । तर सिटीले प्रिमियर लिग र एफए कप दुवै जितेकाले लिगमा दोस्रो भएको आर्सनलले सिटीसँग कम्युनिटी शिल्ड खेल्न लागेको हो ।
खेल लण्डनस्थित वेम्बली स्टेडियममा आइतबार राति नेपाली समय अनुसार ८:४५ बजे सुरु हुनेछ ।
कम्युनिटी शिल्डका लागि मैदान उत्रँदा आर्सनल फेरि एकपटक प्रिमियर लिग उपाधिमा सिटीलाई चुनौती दिनका लागि आफूलाई प्रमाणित गर्न प्रतिबद्ध छ ।
गत सिजन अधिकांश समय लिगमा शीर्ष स्थानमा रहेर पनि आर्सनलले उपाधि जित्न सकेन । आर्सनलले २४८ दिन सिटीमाथि आग्रता बनाए पनि उपाधि जित्न भने चुकेको थियो ।
नयाँ सिजनअघि आर्सनलले मिडफिल्डर डेक्लान राइसलाई वेष्टहमबाट अनुबन्ध गरेको छ ।
यस्तै जर्मन काई हाभार्ट पनि चेल्सीबाट आर्सनल पुगेका छन् । यस्तै अयाक्सबाट डिफेण्डर जुरियन टिम्बर पनि आर्सनल पुगेका छन् ।
सिटीले भने चेल्सीमा माटेओ कोभासिस र आरबी लाइपजिगबाट क्रोसिएन डिफेण्डर जस्को भार्डिओललाई अनुबन्ध गरेको छ ।
प्रिसिजनमा भने दुवैले मिश्रित नतिजा निकालेका छन् । जापान र दक्षिण कोरिया भ्रमण गरेको सिटीले योकोहामा एफ मारिनोस र बायर्न म्युनिखलाई पराजित गर्दा एट्लेटिको मड्रिडसँग पराजित भएको थियो ।
अमेरिका भ्रमणमा आर्सनलले जर्मन क्लब एफसी नुनवर्गसँग पहिलो खेल बराबरी खेल्दा वासिङटनमा एमएसएल अल स्टार टिमलाई ५-० ले पराजित गरेको थियो । त्यसपछि म्यानचेष्टर युनाइटेडसँग २-० ले पराजित आर्सनलले बार्सिलोनालाई ५-३ ले हराएको थियो ।
आर्सनलका लागि प्रि सिजनमा लिएन्ड्रो ट्रोसार्डले सर्वाधिक ३ गोल गरे । नयाँ अनुबन्ध भएका हाभार्टले दुई गोल गरे ।
प्रिमियर लिगको गोल्डेन बुट अवार्ड विजेता एर्लिङ हालान्डले सिटीका लागि २ गोल गरे । उपाधि होडमा सिटीका लागि सबैभन्दा फाइदा उनै हालान्ड रहनेछन् । नर्वेजियन अन्तर्राष्ट्रिय खेलाडी हालान्डले सिटीमा पहिलो सिजन खेल्दा नै धेरै कीर्तिमान बनाएका थिए ।
उनले लिगमा ३६ खेलमा ३५ गोल गर्दा सबैखाले खेलमा सिटीका लागि ५३ खेलमा ५२ गोल गरेका थिए ।
आर्सनलका लागि हालान्ड जस्तै खेलाडी नभएपनि गाब्रीएल मार्टिनेली र कप्तान मार्टिन ओडेगार्डले लिगमा सर्वाधिक १५ गोल गरेका थिए ।
आर्सनलले गत सिजन लिगमा क्लब कीर्तिमानी ८८ गोल गर्दा १६ फरक खेलाडीले गोल गरेका थिए । आर्सनलका म्यानेजर मिकेल आर्टेटाले हरेक ट्रफीका लागि फाइट गर्ने आफूहरुको चाहना नै यही रहेको बताएका छन् । उनले क्लबले त्यसलाई प्रमाणित गर्नुपर्ने बताए ।
गत सिजन उपाधि जित्नका लागि प्रयास पर्याप्त नभएको भन्दै उनले ठूलो ट्रफी जित्न अझ राम्रो गर्नुपर्ने बताए । सिटीका म्यानेजर पेप ग्वार्डिओलाले अहिलेको अवस्था बारे आफूहरु जानकार रहेको भन्दै मानसिक रुपमा तयार हुनुपर्ने बताए । उनले आफूहरु अहिले राम्रो अवस्थामा नरहेको र मानसिक अवस्थाले खेलमा प्रतिस्पर्धा गर्न र उपाधि जित्न सहयोग गर्ने बताए ।
प्रतिक्रिया 4