गोरखामा खोलामा करेन्ट लगाएर माछा मार्ने बिरुद्ध मुद्धा दर्ता

१९ भदौ, गोरखा । गोरखा नगरपालिका–१० स्थित सिर्दिखोलामा करेन्ट लगाएर माछा मार्ने दुई जना पक्राउ परेका छन् । पक्राउ पर्नेमा सोही वडाको छेवेटार बस्ने १८ बर्षिय सन्जय तामाङ र २८ बर्षिया रजित तामाङ रहेको प्रहरीले जनाएको छ ।

प्रहरीका अनुसार मंगलवार बिहान करिव सभा नौ बजेको समयमा करेन्ट लगाएर माछा मार्दै गरेको अवस्थामा उनीहरुलाई पक्राउ गरिएको हो । ‘करेन्ट लगाएर माछा मारिरहेको छन् भन्ने गोप्य सूचना पाएपछि छेवेटारबाट हाम्रो प्रहरी टोली त्यहाँ पुग्यो,’ प्रहरी निरिक्षक शेखर खड्काले भने, ‘करेन्ट लगाउनु हुदैन भनेर सम्झाई बुझाई गर्दा उल्टै प्रहरीलाई धाकधम्की दिएपछि पक्राउ गरेर ल्याएका हौ ।’

उनीहरुको साथबाट माछा मार्न प्रयोग भएको एक÷एक थान ब्याट्री, फुर्लुङ्ग र माछा थाप्न प्रयोग भएको जाल बरामद गरिएको उनले जानकारी दिए । सार्वजनिक बिरुद्धको कसुर शिर्षकमा मुद्धा दर्ता गरी उनीहरुमाथि आवश्यक कारवाही प्रक्रिया अघि बढाइएको प्रहरी निरिक्षक खड्काले बताए ।