२ कात्तिक, जनकपुरधाम । धनुषाको बटेश्वर गाउँपालिकामा प्रदेशस्तरीय तीन दिवसीय महिला कबड्डी प्रतियोगिता सुरु भएको छ ।
स्थानीय शिवशक्ति युथ क्लबको आयोजना तथा बटेश्वर गाउँपालिका–४ कार्यालयको आर्थिक सहयोगमा बिहीबार कबड्डी प्रतियोगिता सुरु भएको हो ।
बिहीबार भएको दुई खेलमा धनुषा र रौतहट महिला कबड्डी टिम विजयी भएका छन् । धनुषाले बारालाई ३३ अंकले र रौतहटले पर्सालाई २१ अंकले पछि पारेर खेल जितेका हुन् ।
धनुषाले ५५ र बाराले २२ तथा रौतहटले ४६ र पर्साले २५ अंक ल्याएका थिए । धनुषाकी दिव्या साह र रौतहटकी जल्सा चौधरी उत्कृष्ट खेलाडी चुनिए ।
बिहीबार धनुषाको आयोजक टिम शिवशक्ति युथ क्लब र सिरहा, महोत्तरी र सर्लाहीबीच खेल हुने आयोजक क्लबका प्रतिनिधि मदन विकले जानकारी दिए ।
कबड्डी प्रतियोगितामा मधेश प्रदेशका ८ वटै जिल्लाका टिम सहभागी छन् । पहिलो हुनेले ५१ हजार, दोस्रोले २५ हजार र तेस्रोले ११ हजार रुपैयाँ पुरस्कार पाउनेछन् ।
प्रतिक्रिया 4