२२ कात्तिक, काठमाडौं । बेन स्टोक्सको शतकको मद्दतमा इंग्ल्याण्डले विश्वकप क्रिकेटमा नेदरल्याण्ड्सलाई १६० रनको जित हात पारेको छ । डिफेण्डिङ च्याम्पियन इंग्ल्याण्डले नकआउट चरणको दौडबाट बाहिरिसकेको छ । तर यो जितले सन् २०२५ मा हुने च्याम्पियनसिप ट्रफीमा छनोट हुने आशा कायमै राखेको छ ।
भारतको पुनेमा इंग्ल्याण्डले दिएको ३४० रनको लक्ष्य पछ्याएको नेदरल्याण्ड्सले ३७.२ ओभरमा सबै विकेट गुमाएर १७९ रन मात्र जोड्न सक्यो ।
नेदरल्याण्ड्सको पारीमा छैटौं विकेटका लागि भएको ५९ र तेस्रो विकेटका लागि ५४ रनको साझेदारी नै ठूलो रह्यो । तेस्रो विकेटका लागि वेस्ली वारेसी र साइब्रान्ड एंगलब्रेक्टले साझेदारी गरेका थिए । वारेसी ३७ र एगेलब्रेक्टले ३३ रनमा आउट भए ।
छैटौं विकेटका लागि तेजा निदामानुरु र कप्तान स्कट एडवर्ड्सले अर्धशतकीय साझेदार गरे । एडवर्ड्स ३८ रनमा आउट हुँदा निदामानुरुले अविजित ४१ रनको पारी खेले ।
नेदरल्याण्ड्सलाई सस्तैमा समेट्ने क्रममा मोइन अली र आदिल रसिदले ३÷३ विकेट लिए ।
यसअघि टस जितेर पहिले ब्याटिङ गरेको बेन स्टोक्सले शानदार १०८ रनको पारीको मद्दतमा निर्धारित ५० ओभरमा ९ विकेट गुमाएर ३३९ रन बनाएको थियो ।
उसका लागि स्टोक्स बाहेक डेविड मालनले ८७ र क्रिस वोक्सले ५१ रन बनाए । त्यसक्रममा मालनले दोस्रो विकेटका लागि जोए रुटसँग अर्धशकीय गरेका थिए ।
स्टोक्स र वोक्सले सातौं विकेटका लागि शतकीय साझेदारी गरे । सातौं विकेटका रुपमा आउट भएका वोक्सले ४५ बलमा ५ चौका र एक छक्कासहित ५१ रन बनाए । अन्तिम दुई बल बाँकी रहँदा नवौं विकेटका रुपमा आउट भएका स्टोकले ८४ बल समना गरे, ६ चौका र ६ छक्का हानेका थिए ।
न्यूजिल्याण्ड्सका बास डे लिडले ३ विकेट लिए भने आयान दत्त र लोगन भान बिकले २–२ विकेट हात पारे ।
प्रतिक्रिया 4