९१ वर्षकी काकीसँग बिहे गरेको दाबी गर्दै २३ वर्षीय युवकले गरे यस्तो माग

आमरुपमा बिहेका लागि उमेर सुहाउँदो जोडी खोजिन्छ । तर, दुनियाँमा उमेरमा आकाश पातलको अन्तर भएका विवाहित जोडी पनि छन् । यस्तै घटना अर्जेन्टिनामा भएको छ । त्यहाँ एकजना २३ वर्षीय युवकले ९१ वर्षकी वृद्धासँग बिहे गरेको घटना सार्वजनिक भएको छ ।

पेशाले वकिल रहेका मरिसिओले आफ्नी मृतक काकी योलान्डा टोरिसको पेन्सनमा दाबी गर्दै मुद्दा हालेका छन् ।

आफूले सन् २०१५ को फेब्रुअरीमा आफ्नी ९१ वर्षीया काकी योलान्डासँग बिहे गरेको उनको दाबी छ । योलान्डाको मृत्यु सन् २०१६ को अप्रिलमा भएको थियो । त्यसैले आफ्नी मृतक पत्नीको पेन्सनको हकदार भएको जिकिर उनले गरेका छन् ।

तर छानबिनका क्रममा मरिसियोका छिमेकीहरुले उनको बिहेको दाबी गलत भएको बताएपछि प्रशासनले उनको पेन्सनको दाबी खारेज गरिदिएको छ ।

अर्जेन्टिनाको उत्तर पश्चिमस्थित साल्टा सहरका बासिन्दा रहेका मरिसियो सन् २००९ मा आफ्ना बुवाआमाको डिभोर्स भएसँगै आमा, बहिनी, हजुरआमा र ठूली काकीसँगै बस्दै आएका थिए । सन् २०१६ मा उनकी काकी योलान्डाको मृत्यु भएपछि उनले काकीको पेन्सन पट्टा आफ्नो नाममा दर्ता गराउने कोसिस सुरु गरे । जसका लागि उनले काकीसँग आफ्नो एक वर्षअघि बिहे भएको झुटो दाबी प्रशासनमा पेस गरे ।

उनको दाबीमा शंका लागेपछि प्रशासनले छानबिन सुरु गर्‍यो र उनका छिमेकीलगायतसँग जानकारी लियो । जसमा छिमेकहीहरुले मरिसियो र योलान्डाबीच बिहे नभएको बताए । त्यसपछि प्रशासनले उनको दाबी खारेज गरिदियो ।

तर मरिसियो यत्तिमा रोकिनेवाला छैनन् । काकीसँग आफूले बिहे गरेको हुँदा आफ्नो नाममा पेन्सन सार्नका लागि सर्वोच्च अदालतसम्मै पुग्ने उनको भनाइ छ ।

स्थानीय एक पत्रिकासँग उनले भनेका छन्, ‘योलान्डा मेरो जीवनमा निकै ठूलो सहारा थिइन् र मसँग बिहे गर्ने उनको अन्तिम इच्छा थियो । मैले योलान्डालाई हृदयदेखि नै प्रेम गर्थें । उनको मृत्युको पीडा मलाई जीवनभर हुनेछ ।’

पेन्सनका लागि आफूले सबै आवश्यक कागजात बुझाएको भए पनि प्रशासनले पेन्सन दिनमा समस्या खडा गरिरहेको उनको भनाइ छ ।

पत्नी दाबी गरेको काकीका बारेमा बताउँदै उनी भन्छन्, ‘योलान्डाको उमेर भलै ९० वर्षभन्दा धेरै थियो तर उनको मन निकै जवान थियो । हाम्रो बिहेमा कुनै पनि कानूनी समस्या नहोस् भन्ने उनको चाहना थियो । योलान्डाले मेरो कानून विषयको पढाइ खर्चमा सहयोग गर्ने बताएपछि हामीले बिहे गर्ने निधो गरेका थियौं । जबकि बुवा आमा छुटि्टएपछि मैले पढाइ छाड्न चाहेको थिएँ ।’